Masalimo 94 - IBAYIBOLO 2024

U Chala we mulongi uwa bantu bosi

¹ Wee Mwene, awe we Chala uwalutanizyo. Wee Chala, uwalutanizyo ilanjizya!

² Wee Chala we mulongi uwa bantu bosi, vundumuka bapanje abantu abakwituvya vivyo vibabaghiye.

³ Wee Mwene nkimba ababibi basekelaye mupaka liyi?

⁴ Bakwituvya, sona ababomba mbibi bakwikwezya.

⁵ Bakubatamya abantu bako, wee Mwene bakubayivya abantu bako abasaliwa.

⁶ Bakubaghogha abakolo abafwilwe na bayeni babo bakwikala muchisu chitu, na bana abalanda bulo, bope bakubaghogha,

⁷ Bakuti, “U Mwene atakutwennya, u Chala uwa Yakobo atakuzimanya.”

⁸ Ivwa kuno mwebapunganu amwe sona mwe basita mahala mwee! Nkimba mukwiza pakuba na mahala liyi?

⁹ Nkimba yuyo akapela amakutu atakwivwa? Pamo yuyo akapanga amaso atakwennya?

¹⁰ Nkimba yuyo akuzipa amafundwe inko atakuzifunda? Nkimba yuyo akumumanyisya umuntu akusobelwa ubumanyi.

¹¹ U Mwene azimenye inyinong'ono izya muntu ukuti mpepo bulo.

¹² Wee Mwene musayiwa umuntu yuyo ukumumanyisya inkalo, umuntu yuyo ukumumanyisya ukufuma mu ndaghilo zyako,

¹³ ukumupa ubutuzyo pakabalilo akantamyo, mupaka umuntu umubibi yula injile muchiliba.

¹⁴ Pakuti u Mwene atakubakana nalumolumo abantu bache. Eee atakuchisula nalumolumo ichilingo chache.

¹⁵ Ubulongi bukunyokela sona ku bugholosu, abantu abagholosu babukonkaye.

¹⁶ Nkimba wewenu akujimba ukuti alwane na bantu ababibi? Nkimba alipo yumo yuyo akunyimila ukuti indwane na babomba mbibi?

¹⁷ Nanti u Mwene atakabanga mwavwilizi wane, ngali ubumi bwane buzimiye.

¹⁸ Bo nkwinong'ona ukuti ulwayo lwane lukutyelemuka, wee Mwene ulughano lwako lukanyavwa

¹⁹ Bo ukupasya kukubalilabalila, awe ukughusangalusya umuzimu wane nulusekelo.

²⁰ Nkimba abalongi abamabeko bangamanyana namwe, babo bakubomba ububibi pakususannya ni ndaghilo?

²¹ Bakubavwima abagholosu, po bakubaghogha abantu babo bate ninongwa.

²² Loli u Mwene we lilinga lyane, sona u Chala aba lyalabwe lyane mumo nkuponelamo.

²³ Akwiza pakubatanizya pachifukwa icha mbibi zyabo, po akwiza pakubanangannya pachifukwa icha bubibi bwabo. U Mwene u Chala witu akwiza pakubazimizya.