Masalimo 92 - IBAYIBOLO 2024

Ulwimbo ulwamapalo

Isalimo, Ulwimbo Pisiku Ilyakutuzya.

¹ Chintu chiza nkani pakumupala u Mwene. Ukulyimbila inyimbo itabwa lyako, Wee Wakumwanya Nkani,

² pakululumbilila ulughano lwako pandabindabi, sona pakubulumbilila ubusubiliwa bwako pabusiku,

³ pakwimba inyimbo na mapango sona ni vinanda.

⁴ Wee Mwene Pachifukwa ichakuti ukuhobosya ni mbombo zyako, pachifukwa icha mbombo izya nyobe zyako nimbaye nukusekela.

⁵ Imbombo zyako nkulu nkani, we Mwene Zyope inyinong'ono zyako nyibizu nkani.

⁶ Umuntu umusita mahala atakumanya, bope abapunganu batakwivwisya.

⁷ Napapo abantu ababibi bakumela ngati lisote, sona ababibi bakulama ngati bwezya abantu banaba bakwiza pakunyunkuliwa ngati lisote.

⁸ Loli awe we Mwene upaliwanje bwila na bwila.

⁹ Naloli abalwani bako bakwiza pakuzimila, po ababomba imbibi bosi bope banyampanaye.

¹⁰ Loli waghakwezya amaka ghane ngati lupembe ulwa mpogho, wapungulila amafuta gha syunguti pamutu wane.

¹¹ Amaso ghane ghennya ukupotwa ukwa balwani bane, nivwa nukwivwa na makutu ghane ukulila ukwa balwani bane.

¹² Abantu abagholosu bakwela ngati mabale, sona bakukula ngati makwi agha mwale agha mu Lebanoni,

¹³ ghagho ghabyaliwe mu Nyumba iya Mwene, sona ghagho ghakwela mulubinjilo ulwa Chala.

¹⁴ Napapo bangaghosipa, pope bulo bakwiza pakwela ivikomwa, ghakwiza pakuba mabisi sona ghamaka.

¹⁵ Mulumbilile mutinji, “U Mwene mugholosu akabalilo kosi, we lyalabwe lyane, sona butalimo ububibi nabumobumo mumwache.”