Masalimo 91 - IBAYIBOLO 2024

U Chala we wakutuzighilila

¹ Umuntu wesi yuyo akwikala mubuzilo ubwakuvwamo Uwakumwanya Nkani, akwikala muchizyezye icha Uwamaka Ghosi,

² Nkuti, “U Mwene wakuvwamilamo ni linga lyane, u Chala wane yuyo imusubiye.”

³ Pakuti akwiza pakukusatula muchipingo icha bateghi, sona na kuviwaya ivyakoghofya.

⁴ Akwiza pakukuvwinka na meya ghache, muvipapande vyache ukwiza pakuponelamo, ukusubiliwa kwache yo ngulu yitu ni chakuponelamo.

⁵ Utakanyilaye ivyakoghofya ivya busiku, pamo impalala izya kusumbiwa pamusanya,

⁶ manyi iviwaya vivyo mukukomana navyo muchisi, pamo ububibi ubwa pamusanya.

⁷ Abantu 1,000 baghoghiwanje papipi nawe, sona bope abantu 10,000 babo bali kunyobe yako indilo, loli awe utakwiza pakuvulala.

⁸ Ukwiza pakuchennya bulo na maso ghako, nukulwennya ulufundo ulwa bantu ababibi.

⁹ Pakuti wamupela Uwakumwanya Nkani pakuba lilinga lyako, sona nu Mwene bulo we wakuvwamilamo kwane.

¹⁰ Po butalipo nabumobumo ububibi ubwakukuwila, sona ni chiwaya bulo chitakwiza pakupalamila pachisakasa chako.

¹¹ Pakuti akwiza pakubalamula abantumi bache, ukuti bakuvighililaye kosi kuko ukubuka.

¹² Bakwiza pakukunyamula munyobe zyabo, umwakuti utakipunule ulwayo lwako pibwe.

¹³ Ukwiza pakuzikanya inkalamu ni njoka izyakoghofya, momumo ukwiza pakubakanya abana aba nkalamu nu chipili.

¹⁴ U Mwene akuti, “Pachifukwa ichakuti anganite, nkwiza pakumupoka. Nkwiza pakumupoka pachifukwa ichakuti akunyitika.

¹⁵ Bo akunyitizya, ane nkwiza pakumwamula. Nkwiza pakuba nawe muntamyo zyache zyosi, nkwiza pakumupoka nukumuchindika.

¹⁶ Nkwiza pakumupa ubumi ubutali nukumupoka.”