Masalimo 90 - IBAYIBOLO 2024

Ibuku Ilyafolo Masalimo 90-106 Nizya Chala nu muntu

Ukwiputa ukwa muntu uwa Chala u Mozesi.

¹ Wee Mwene, awe we kwikalamo kwitu pa nkulilo zyitu zyosi.

² Bo amaghamba ghatapapiwe, pamo bo utachipelite ichisu ichapasi, awe we Chala bwila na bwila.

³ Ukubanyosezya abantu kulufumbi nukuti, “Mwee bana ba bantu nyokela kulufumbi.”

⁴ Pakuti awe amaka amasabuzani ghayanite bulo ni siku lyoka lilyo lyabuka bulo, pamo ngati kabalilo akapimpa aka pabusiku.

⁵ Umwakuchenusya bulo, ukubefya abantu. Bali ngati lisote, abantu banaba bali ngati lisote ipya ilya pandabindabi,

⁶ pa pandabindabi likulemba, pachamabwila likuma nukufoka.

⁷ Aswe tukuzimila nubukali bwako, sona ukutoghofya nu bukalale bwako.

⁸ Wazivumbula imbibi zyitu pamaso papako, zyope imbibi izya kubusyefu wazivumbula pabuzelu

⁹ ubumi bwitu bwaba bupimpa pachifukwa icha kukalala kwako, ubumi bwitu bukuzyebeluka bulo ngati muyi.

¹⁰ Ubwinji ubwa masiku ghitu ghali 70 pamo 80 nanti tuli na maka, loli ubumi ubwa muntu buli nintamyo zyene sona ni chitima, vikumala lubilolubilo nkani, po twebosi tukubuka.

¹¹ Nkimba wewenu yuyo abumenye ubukalale ubwa maka ghako? Nkimba wewenu akumenye ukunyila ukwa bukali bwako?

¹² Tumanyisye pakughabelenga amasiku ghitu ukuti tubanje na mahala.

¹³ Wee Mwene, isya ubukali bwako, nkimba ukwiza pakutukalalila mupaka liyi? Ubanje ni chililizi na babombi bako.

¹⁴ Utwikutizyanje pandabindabi nu lughano lwako ulusita kumala, umwakuti tusekelaye nukuhoboka amasiku ghitu ghosi.

¹⁵ Utuhobosyanje ukuyana na masiku aminji ghagho watuyivizizya, ukuyana namaka aminji ghagho twakomana nintamyo.

¹⁶ Imbombo zyako zibonekaye pa mubombi wako, bope ubuchindamu bwako bubonekaye pa bana babo.

¹⁷ Wee Mwene u Chala witu, u bwiza bwako bubanje papitu. Uzisaye imbombo izya nyobe zyitu, eee uzisaye imbombo izya nyobe zyitu.