Masalimo 9 - IBAYIBOLO 2024

Ukumupalizya u Chala pachifukwa icha bwanaloli bwache

Kumulongozi uwa bwimbi. Ukuyana nu lwimbo ulwakuti, “Ubufwe ubwa Mwana umulumendo.” Isalimo ilya Devedi.

¹ Wee Mwene nkwiza pakukupala nu moyo wane ghosi, sona nkwiza pakubapangila nizya viswigho vyako vyosi.

² Nkwiza pakuhoboka nukusekela pachifukwa icha wewe, sona nkwiza pakulipalagha itabwa lyako, wee Wakumwanya Nkani.

³ Abalwani bane bakunyokela kwisinda, sona bakwipunula nukuzimila pamaso papako.

⁴ Pakuti wansimikizya ukuti ane inte ninongwa, sona wikaye pachitengo chako icha bumwene pakulongela mubwanaloli.

⁵ Wazichemela inko sona wabanangannya abantu ababibi, waghazimya amatabwa ghabo bwila na bwila.

⁶ Abalwani bitu bazimila, watumongolannya utwaya twabo utukulu nkani, umwakuti tutakwiza pakukumbukiliwa sona.

⁷ U Mwene akulaghilagha bwila, sona ikazizye ichitengo chache icha bumwene ukuti alongaye inongwa.

⁸ Akwiza pakuchilonga ichisu ichapasi mubugholosu, sona akwiza pakubalaghila abantu mubwanaloli.

⁹ U Mwene we wakuvwamamo abantu abakuyivyiwa sona we pakuponelamo pakabalilo akantamyo.

¹⁰ Babo balimenye itabwa lyako, bakwiza pakukusubila, pakuti we Mwene utabalekitepo nalumo babo bakukulonda.

¹¹ Mumwimbilaye u Mwene, inyimbo izya mapalo yuyo ikaye pachitengo icha bumwene mu Ziyoni. Lumbililagha nizya mbombo zyache pakasi pa inko zyosi.

¹² Yuyo akutanizya abaghoghi akubakumbukagha abafwe, sona atakuluvyanga ukulila ukwa babo bali mumayimba.

¹³ Wee Mwene, ennya namumo abalwani bane bakunvwimila, umpelelaye ichisa nukumpoka kubufwe.

¹⁴ Po nkwiza pakukupala pamilyango iya Ziyoni, sona palapala nkwiza pakusekela pachifukwa icha bupoki bwako.

¹⁵ Abantu aba inko izinji bawila muchiliba chicho bikumbiye bene, sona inyayo zyabo zilemiwe muchilepa chicho bakategha.

¹⁶ U Mwene ivumbuye mwene pachifukwa icha bwanaloli bwache, sona ababibi balemiwe muchipingo icha mbombo zyabo.

¹⁷ Ababibi bakwiza pakubuka kuchisu icha bafwe, kokuti inko izya bantu bosi babo bamuluvyizye u Chala.

¹⁸ Loli abapina atakubaluvyanga nalumolumo, sona ulusubilo lwabapina lutakupotwangapo.

¹⁹ Wee Mwene vundumuka, sona umuntu atakapotaye. Uzilongaye inko pamaso papako.

²⁰ Wee Mwene ubapelelaye ubogha, sona inko izinji zimanye ukuti bantu bulo.