Masalimo 89 - IBAYIBOLO 2024

Ulwimbo ulwapantamyo izya chisu

Ukwinong'ona nkani isalimo ilya Ethani uwamu Ezila.

¹ Nimbaye ulughano ulukulu nkani ulwa Mwene bwila na bwila, Nu mulomo wane ifumusyanje ubusubiliwa bwako ukuti bumanyikwanje ku nkulilo zyosi.

² Ifumusyanje ulughano lwako ukuti ulwa bwila na bwila, po ubusubiliwa bwako ubwa bwila na bwila ngati mwanya.

³ Wanena ukuti, “Nafinga ulufingo nu musaliwa wane, nalapa ichilapo nu mubombi wane u Devedi,

⁴ ‘Nkwiza pakulwikazya uluko lwako pakuba lwa bwila na bwila, sona nkwiza pakuchipela ichitengo chako cha bumwene, pakuba icha maka mupaka kunkulilo zyosi.’ ”

⁵ Wee Mwene kumwanya kupalaye imbombo zyako izyakuswighisya, ulukomano ulukulu nkani ulwa bantumi lukupalaye pachifukwa icha busubiliwa bwako.

⁶ Nkimba wewenu mumwanya angayana nu Mwene? Nkimba wantumi wenu uwakumwanya yuyo ayanite nu Mwene?

⁷ Bakumunyila nkani u Chala mulukomano uluzelu nkani, sona wakuswighisya ukubachila bosi babo bamuzyunguliye

⁸ Wee Mwene u Chala Uwamaka Ghosi, nkimba wewenu yuyo ayanite nawe? Wee Mwene awe we wamaka, ubusubiliwa bwako bope bukuzyunguliye.

⁹ Ukulaghila panyanja inkali, nanti amayigha ghakunyamuka, ukughapumizya.

¹⁰ Ukamutizannya u Ahabu ngati muntu umufwe. Namaka ghako amakulu nkani ukabanyampannya abalwani bako.

¹¹ Kumwanya kwako sona chope ichisu ichapasi chako. Ukachipela ichisu ichapasi poka na vyosi vivyo vili mumo.

¹² Ukapela ichisu icha kumitu nicha kuntende, amaghamba agha Taboli nilya Helimoni ghakusekela nukulipala itabwa lyako.

¹³ Inyobe yako yamaka, amaka ghako makulu sona ghapamwanya.

¹⁴ Ubugholosu bwako nu bwanaloli lo lwalo lwachitengo icha bumwene bwako. Ulughano nu busubiliwa vikukufughamilila.

¹⁵ Basayiwa abantu babo bakukuchindika, wee Mwene basayiwa abantu babo bakwenda mukulama kwako.

¹⁶ Basekelaye mwitabwa lyako isiku lyosi, babupalaye ubugholosu bwako.

¹⁷ Pakuti awe we buchindamu bwabo sona we maka ghabo, po ichisa chako chipaliwanje.

¹⁸ Naloli ingulu yitu ya Mwene, u mwene witu we Muzelu uwa ba Izilayeli.

¹⁹ Akabalilo kamo ukababuzya abasubiliwa bako muchisetuka ukuti, “Nayibika impumpu yane pa muntu uwamaka nkani, namukwezya umuntu umunandi nkani pakasi pa Izilayeli.

²⁰ Namwagha u Devedi umubombi wane. Po namupakazya amafuta amazelu

²¹ Inyobe yane yibanje nawe, Eee, yimupanje amaka.

²² Abalwani bache batakwiza pakumusambukila, po abantu ababibi batakwiza pakumumala.

²³ Imbatizannyanje abalwani bache, sona imbamalaye abalwani bache.

²⁴ Ubusubiliwa bwane nu lughano lwane vibanje nawe. Ukwendela Mwitabwa lyane amaka ghane ghakwiza pakukweziwa.

²⁵ Nkwiza pakubika inyobe yane panyanja inkulu nkani, po inyobe yache indilo palusoko ulwa Yufuleti nu Tigilisi.

²⁶ Ambuzye ukuti, ‘Awe we Tata wane nu Chala wane, sona we lyalabwe Umupoki wane.’

²⁷ Eee, namusala pakuba we katote wane, u mwene uwapamwanya nkani pachisu ichapasi pano.

²⁸ Nkwiza pakumughana bwila na bwila, po ntakwiza pakulunangannya nalumo ulufingo.

²⁹ Nkwiza pakulwikazya uluko lwache pachitengo icha bumwene bwila na bwila. Po ubumwene bwache butakwiza pakuba nubumalilo ngati masiku agha mumwanya.

³⁰ “Nanti abana bache bakuzisula indaghilo zyane, sona batakuvikonka ivimanyilo vyane,

³¹ nanti bakughanangannya amalamulo ghane, nanti bakupotwa pazikukonka indaghilo zyane.

³² Nkwiza pakubafunda ni ndisa pachifukwa icha mbibi zyabo, po bakwiza pakusyempiwa pachifukwa icha bubibi bwabo,

³³ Pope bulo ntakwiza pakwefya ulughano lwane papache, sona ntakwiza pakuba ne musubiliwa.

³⁴ Ntakwiza pakulunangannya ulufingo lwane, pamo ukwandula zizyo imilomo yane yanena.

³⁵ Nalapa aka kwanda naka bumalilo mubuzelu bwane, ukuti ntakwiza pakumuzimbula u Devedi.

³⁶ Ukuti uluko lwache lukwiza pakubangako bwila na bwila. Po ichitengo chache icha bumwene cha bwila na bwila pamaso papane ngati lizuba.

³⁷ Ubumwene bwache bukwiza pakwikalana bwila na bwila ngati mwezi, ubusubiliwa bunubu bukubikila ubwakaboni mumwanya.”

³⁸ Loli mwamutagha nukumukana umupakiwa winyu. Po mumukalaliye nkani.

³⁹ Walunangannya ulufingo lulo ukafingana nu mubombi wako, wayinyazya impumpu nu lufumbi.

⁴⁰ Walumongolannya ulubumba lwakaya kache akakulu, amalinga ghosi ghaba visami.

⁴¹ Abantu bosi babo bakudumusannya palapala bakumufyula, po abapalamani bache bosi bakumobezya.

⁴² Waghabika amaka agha balwani bache pamwanya papache, po wabapela abalwani bache ukuti basekelaye.

⁴³ Wabumbizya upanga wache, utamwavwizye pakabalilo aka bwite.

⁴⁴ Wefyamo indisa iya bumwene munyobe zyache, wachisumba pasi ichitengo chache icha bumwene.

⁴⁵ Wefyako ubwinji ubwa masiku agha bulumendo bwache, po wamukozya isoni.

⁴⁶ Wee Mwene, nkimba ukwiza pakwifisa mupaka liyi? Nkimba ukukalala kwako kwakaye ngati moto mupaka liyi?

⁴⁷ Ukumbukaye ukuti ubumi bwane bupimpa nkani. Nkimba choni chicho ukamupela umuntu ukuti atakabanje nimbombo nayimo?

⁴⁸ Nkimba muntu wenu yuyo angikala ukusita ukufwa, pamo ukwipoka mwene kumaka agha ipumpa?

⁴⁹ Wee Mwene, nkimba ulughano lwako lwakale luli kwiyi, chicho mubusubiliwa bwako ukalapa kwa Devedi?

⁵⁰ Wee Mwene, ukumbukaye mumo umubombi wako bamobezekezya, sona namumo nkujimbila umusamu uwa inko izinji.

⁵¹ Wee Mwene, Intuko zizyo abalwani bane bakunsamula nazyo, bakumusala umupakiwa wako posi papo akwenda.

⁵² U Mwene apaliwanje bwila na bwila. Ameni! Ameni!