Masalimo 88 - IBAYIBOLO 2024

Ulwiputo ulwakulaba ubwavwilizi

Kumulongozi uwa bwimbi. Ulwimbo. Isalimo ilya baluko ulwa Kola. Ukuyana nu mahalatati lenoti. Ukwinong'ona nkani isalimo ilya Hemani uwamu Ezila.

¹ Wee Mwene, u Chala yuyo akumpoka, nkulila umusanya nu busiku.

² Ulwiputo lwane lufikaye kukwako, ivwa ukulila kwane.

³ Pakuti umuzimu wane wizuye nintamyo sona indi papipi pakufwa.

⁴ Nkupimiwa ngati ne muntu yuyo bakumwinjizya muchiliba. Eee, indi ngati muntu yuyo ate na maka.

⁵ Indi ngati muntu yuyo bamulekite pakasi pabantu abafwe, sona indi ngati muntu yuyo aghoghiwe alambalaye mwipumpa. Umuntu yuyo mutangamukumbuka sona, umuntu yunuyu mutakumupasikizya nukumupasikizya.

⁶ Wambika muchiliba ichibizu nkani, mubuzilo ubwa chisi nkani

⁷ Ubukali bwako bukunfyenyelekezya pasi, po ghope amayigha ghako ghosi ghakundwibika.

⁸ Wabapela abamanyani bane ukuti banchimbile. Po wampela ane pakuba ne chintu ichakoghofya kubabo. Ane nighaliliwe umwakuti intakachimbile

⁹ Amaso ghane ghakwennya ukabefu pachifukwa icha chitima. Wee Mwene isiku ni siku nkukwitizya, bo nkwiputa nkukwezya inyobe zyane mumwanya kukwako.

¹⁰ Nkimba ukubabombela ivyika abantu abafwe? Nkimba bope abafwe bakuzyuka nukukupala?

¹¹ Nkimba ulughano lwako lukulumbililiwa mwipumpa, pamo ubusubiliwa bwako bukulumbililiwa mubuzilo ubwa kunanganika?

¹² Nkimba imbombo zyako izyakuswighisya zingamanyikwa muchisi, pamo ubugholosu bwako muchisu icha chiluvya?

¹³ Wee Mwene nkulila kukwako, pandabindabi nkukwiputa.

¹⁴ Wee Mwene, nkimba choni chicho wantagha bunubu nukumpa inkonto?

¹⁵ Ukwanda ko kubwana bwane nayimba nkani mupaka nkaba papipi nukufwa. Ane nayimba ni vintu ivyakoghofya, po amahala ghope ghamalila.

¹⁶ Ubukali bwako bukunfyenyelekezya pasi, po ivyakoghofya vyako vyope vyandema nukungogha.

¹⁷ Bakunzyungulila isiku lyosi ngati mayigha ghanyighaliye kosi na kosi.

¹⁸ Wabachimbizya Abamanyani na baghaniwa bane, ichisi cho chaba mumanyani wane uwa pamoyo.