Masalimo 87 - IBAYIBOLO 2024

Ukukapala akaya aka Yelusalemu

Isalimo ilya baluko ulwa Kola. Ulwimbo.

¹ Pighamba izelu u Mwene azengapo ulwalo ulukulu nkani.

² U Mwene ayighanite nkani imilyango iya kaya akakulu nkani aka Ziyoni, ukuchila mosi mumo u Yakobo akwikalamo

³ Wee kaya akakulu nkani aka Chala, ivintu ivyabuchindamu vikuneniwa nizya awe.

⁴ Pakasi pabantu babo bamenye ane, we Lahabu nu Babiloni, nu Filisiti, sona Tile, poka nu Etiyopiya, “Aba bo babo bakapapiwa mu Ziyoni.”

⁵ Po abantu bakwiza pakunena nizya Ziyoni ukuti, “Uyu na yula bakapapiliwa mulamula.” Pakuti Uwakumwanya Nkani akwiza pakubapa amaka.

⁶ U Mwene amusimbaye mwibuku ilya bantu aba inko ukuti, “Uyu akapapiliwa mu Ziyoni.”

⁷ Abimbi naba kwimba batinji, “Imbwibwi zyitu zyosi zili mumwako.”