Masalimo 86 - IBAYIBOLO 2024

Lwiputo ulwakulaba ubwavwilizi

Ulwiputo ulwa Devedi.

¹ Wee Mwene, unteghelezye sona unyamule. Pakuti ane ne muntu umupina sona ne musobelwe.

² Ubusungaye akiza ubumi bwane, pakuti ane niyipiye nkani kukwako, Awe we Chala wane we umupokaye umubombi wako, umubombi yuyo akusubiye.

³ Wee Mwene mpelela ichisa, pakuti isiku lyosi nkukulilila.

⁴ Wee Mwene musekelezyanje umubombi wako, pakuti kukwako, nkughubika umuzimu wane.

⁵ Wee Mwene we mwiza sona we wakuhobokela, we musubiliwa nkani ku bantu bosi babo bakukwiputa.

⁶ Wee Mwene teghelezya ulwiputo lwane. Ivwa ukulila kwane, bo nkukulaba ukuti unyavwe.

⁷ Pisiku ilya ntamyo zyane, nkukwitizya, po ukwiza pakunyamula.

⁸ Wee Mwene pakasi paba chala atalipo nayumoyumo yuyo ayanite nawe. Zitalipo nazimozimo imbombo zizyo ziyanite ni zyako.

⁹ Wee Mwene inko zyosi zizyo wazipela, zikwiza pakukwiputa pamaso papako, po zikwiza pakulichindika itabwa lyako.

¹⁰ Pakuti we mukulu nkani sona imbombo zyako zyakuswighisya. Awe wemwene mpela we Chala.

¹¹ Wee Mwene umanyisye izila zizyo ukuzilonda ukuti inzikonkaye, po nkwiza pakwenda mubwanaloli bwako. Umpele ukuti imbanje nu moyo uwakwiyipa nkani, umwakuti indinyilaye itabwa lyako.

¹² Wee Mwene Chala wane, nkupalizyanje nu moyo wane ghosi, indichindikaye itabwa lyako bwila na bwila.

¹³ Pakuti ulughano lwako papane lukulu nkani. Waghupoka umuzimu wane kubuzilo ubwibizu ubwa bafwe.

¹⁴ Wee Chala wane, abantu abamituvyo bansambukila, ichilundilo icha bantu ababibi chikulonda pakungogha, abantu babo batabikiyeko nu moyo nizya awe.

¹⁵ Loli awe wee Mwene we wachililizi nu wachisa, yuyo atakukalala lubilolubilo nu walughano nkani, sona nu musubiliwa.

¹⁶ Unyennye nukumpelela ichisa. Umpanje amaka ne mubombi wako. Umupoke umubombi uwa mwana wako umulindu.

¹⁷ Undanjizye ichimanyilo icha bwiza bwako, umwakuti abantu babo bambengite bennye, nukukoziwa isoni, pachifukwa ichakuti awe we Mwene wanyavwa, nukunsangalusya.