Masalimo 85 - IBAYIBOLO 2024

Ukubiputila aba Izilayeli ichisa icha Chala

Kumulongozi uwa bwimbi. Isalimo ilya baluko ulwa Kola.

¹ Wee Mwene ukachipelela ichisa ichisu chako, ukamunyosekezya u Yakobo ubwiza.

² Ukabahobokela imbibi abantu bako, uzimye imbibi zyabo zyosi.

³ Wefizyepo ukukalala kwako kosi, ukakuleka ukukalala kwako ukwakoghofya.

⁴ Wee Chala Umupoki witu, utunyosezye papo, utakatukalalilaye!

⁵ Nkimba ukwiza pakutukalalila bwila na bwila? Nkimba ukwiza pakukalala mupaka ku nkulilo izya muntazi?

⁶ Nkimba utakwiza pakutupa sona ubumi ukuti twe bantu bako tusekelaye mumwako?

⁷ Wee Mwene Ubanje naswe ni chisa chicho chitakumala, sona utupoke.

⁸ Nkuziteghelezya zizyo u Chala u Mwene akunena. Akubalayizya umutende abantu bache, abantu bache abazelu. Batanyokele sona kubupunganu bwabo.

⁹ Naloli ubupoki buli papipi na bantu babo bakumunyila, po ubuchindamu bwache bubanjeko pachisu chitu.

¹⁰ Ulughano nu busubiliwa vikomanaye, ubugholosu nu mutende vilamunkanaye nu lughano ulwenecho.

¹¹ Ubusubiliwa bumelaye pachisu ichapasi, ukufuma kumwanya ubugholosu bwennyanje pachisu ichapasi.

¹² Naloli u Mwene abapanje ivintu ivyiza, po ichisu chitu chope chipanje inyinulo inyiza.

¹³ Ubugholosu bo bwendaye pamaso papache. Eee ubugholosu bunubu bukwiza pakwipela pakuba zila yache iyakwendamo umwene.