Masalimo 84 - IBAYIBOLO 2024

Ukuyisamba Inyumba iya Chala

Kumulongozi uwa bwimbi. Ukuyana nu lwimbo ulwa Agiti. Isalimo ilya baluko ulwa Kola.

¹ `````````````````````````````````````````````````````````````````````````````````Wee Mwene Uwamaka Ghosi, nkimba bo bwiza boni ubwa Nyumba yako?

² Umuzimu wane ghukulusamba sona ghukululonda nkani ulubinjilo ulwa Mwene. Umoyo nu mubili wane vikumwimbila nu lusekelo u Chala uwa bumi.

³ Nu twatiti bulo tukwaghamo umwakutengamo ivivumbo vyabo, po abakabelebeswa bope bakwitengelamo ivivumbo, ukuti babalulilayemo utwana, papipi ni vighemo vyako. Wee Mwene Uwamaka Ghosi, we Mwene nu Chala wane.

⁴ Basayiwa abantu babo bakwikala munyumba yako, bakukupalizya akabalilo kosi.

⁵ Basayiwa abantu babo amaka ghabo ghali mumwako, babika amoyo ghabo pakwenda muzila iyakubukila ku Ziyoni.

⁶ Bo bakudumusannya mwikombe ilya Baka, palapala bakuyipela pakuba mbwibwi ivula iya chizimya lupya yikwiza pakwizuzya nulusayo.

⁷ Amaka ghabo ghakukulilakulila, po bakwiza pakuboneka pamaso pa Chala mu Ziyoni.

⁸ Wee Mwene u Chala Uwamaka Ghosi ivwa ulwiputo lwane, wee Mwene u Chala uwa Yakobo nteghelezya.

⁹ Wee Chala, ennya ingulu yitu. Mupelelaye ichisa umupakiwa wako.

¹⁰ Ukuba palubinjilo lwako isiku lyoka, chizapo ukuti ane imbanje mulubinjilo lwako ukuchila pakubapo amasiku amasabuzani kosi na kosi. Chingaba chizapo ukuti imbanje ne mulindilili uwa pamulyango uwa Nyumba iya Chala, ukuchila ukuti imbanje muchisakasa icha bantu ababibi.

¹¹ Pakuti u Mwene u Chala lizuba sona ngulu, akutupa ivyiza vyosi sona akutuchindika. U Mwene akubapa ivintu ivyiza abantu babo bagholosu.

¹² Wee Mwene Uwamaka Ghosi, basayiwa abantu babo bakukusubila.