Masalimo 83 - IBAYIBOLO 2024

Ukwiputila ukuti aba Izilayeli babapotaye abalwani babo

Salimo ilya Asafu Ulwimbo.

¹ Wee Chala, utakabanje bulo myee, wee Chala utakapumaye bulo, pamo pakuba ngati po we chimyeka.

² Ennya abalwani bako bavulungana, sona abantu babo bakubengite basambuka.

³ Bakubatika pakubabombela ivibibi abantu bako, sona bakubatika pakubabombela ivintu ivibibi abantu babo bapamwanya kukwako.

⁴ Bakuti, “Zagha tuluzimye uluko lwabo, umwakuti itabwa ilya Izilayeli litakakumbukiliwanje sona.”

⁵ Naloli bakwikala pasi nukubatika ububibi, bakulapa ichilapo ukuti bakusambukile.

⁶ Banaba bo bantu aba Edomu naba Ishimayeli naba Mowabu sona naba Hagili,

⁷ naba Gebala naba Amoni naba Amaleki naba Filisiti poka na bantu aba mu Tile.

⁸ Wepe u Asiliya aba poka nabo, banaba bazikazya inko izya Loti.

⁹ Ubabombelaye zizyo ukababombela aba Midiyani, nu Sisela sona nu Yabini pa lusoko ulwa Kishoni,

¹⁰ babo ukabanangannya pa Endoli, amabili ghabo ghabolela mwitope.

¹¹ Ubabombele abalongozi babo, zizyo ukamubombela u Olebu nu Zebu. Bope abalaghili babo, ubabombele zizyo ukamubombela u Zebu nu Zalimuna,

¹² Po bakati, “Zagha tuchifyule ichisu icha Chala ukuti chibanje chitu ni chitu.”

¹³ Wee Chala wane ubapelaye ngati lufumbi, ilyelelo lyilo lukuputiwa ni mpepo.

¹⁴ Ngati mumo umoto ghukochela umusitu, sona mumo impesese zikochela amaghamba.

¹⁵ Momumo ubachimbizizye nu kankungu. Nukuboghofya nimpepo iyakuka.

¹⁶ Wee Mwene bizuzyanje ni soni, umwakuti balilondelezyanje itabwa lyako.

¹⁷ Bakoziwanje isoni nukuba nubogha, sona bafwanje ubufwe ubwakukozya isoni.

¹⁸ Bakumanye ukuti naloli awe itabwa lyako we Mwene, we Wakumwanya Nkani pachisu chosi ichapasi ichi.