Masalimo 81 - IBAYIBOLO 2024

Inyimbo izya palusekelo

Kumulongozi uwa bwimbi. Ukuyana nu lwimbo ulwa Giti Isalimo ilya Asafu.

¹ Mumwimbilaye nu buhobosu u Chala witu yuyo maka ghitu, mumwimbilaye u Chala uwa Yakobo umwakukolomoka!

² Imbagha inyimbo pakulizya ivisekeseke, lizya ivinanda na mapango vivyo vikulila akiza nkani.

³ Lizya ipati palusekelo ulwa Kupanta ukwa Mwezi, sona bo umwezi wabulunga, pisiku ilya lusekelo lwitu.

⁴ Pakuti ulu lo lulaghilo ulwaba Izilayeli, lulo akalubika u Chala uwa Yakobo.

⁵ Akalubika pakuba lulaghilo kwa Yosefu, bo abuka pakulwa ubwite mu Ijiputi, kuko nkayivwa ineno yiyo tutakayimanya.

⁶ Akati, “Nkabapepula ukatundu umung'wamu pavipunko vyabo, inyobe zyabo zyope zikasatuka pakunyamula ichidudunga iching'wamu.

⁷ Bo muli muntamyo mukanyitizya, po nkabapoka, nkabamula bo indi mwibingu, po nkabayela pambwibwi iya mizi pa Meliba.

⁸ “Mwee bantu bane, ivwa kuno, imbasoke, mwee ba Izilayeli, ngali mukanyivwilagha!

⁹ Patakabanje abachala abayeni pakasi papinyu, sona mutakabiputaye abachala abanji.

¹⁰ Ane ne Mwene u Chala winyu, yuyo akabefya muchisu icha Ijiputi. Asama nkani amalomo ghinyu, Po nkwiza pakubalyesya.

¹¹ “Loli abantu bane batakanteghelezya, aba Izilayeli batakanyivwila.

¹² Po nkabaleka bulo na moyo ghabo amakafu, umwakuti babombaye vivyo bakuvilondagha.

¹³ “Nanti abantu bane bakanyivwilagha, ngali aba Izilayeli bakabomba vivyo nkavilonda.

¹⁴ Ngali nabapota abalwani babo lubilolubilo, sona ngali nabafunda abantu babo bakubabenga.

¹⁵ Abantu babo bamubengite u Mwene bakumufughamilila umwakunyila pamaso papache, loli ulufundo lwabo lubanje lwa bwila na bwila.

¹⁶ Ngali nabalyesya ichibama ichiza, sona nukubikusya nu buchi ubwa mumpako.”