Masalimo 80 - IBAYIBOLO 2024

Ulwiputo ulwakubanyosekezya mumo aba Izilayeli

Kumulongozi uwa bwimbi. Ukuyana nu lwimbo ulwakuti, “Ubwezya ubwa mumizi.” Ulufingo. Isalimo ilya Asafu.

¹ Wee mudimi uwa Izilayeli, tegha ikutu, wewe akumulongozya u Yosefu ngati mudimo uwa ng'ozi, we ukwikala pachitengo icha bumwene pakasi pa bakelubi. Ubalamilaye

² abaluko ulwa Efulayimu nulwa Benjamini sona nulwa Manase lanjizya amaka ghako, po wizaye pakutupoka.

³ Wee Chala, tunyosekezye mumo tukabela kale, icheni chako chitulamilaye, po tukwiza pakupokiwa.

⁴ Wee Mwene u Chala Uwamaka Ghosi, nkimba ukwiza pakuzikalalila inyiputo izya bantu bako mupaka liyi?

⁵ Wabapa amasozi pakuba chibama, wabang'wesya ulubako ulwizule na masozi.

⁶ Watupela pakuba bantu abasamuliwa pakasi pa bapalamani bitu, bope abalwani bitu bakutobezya.

⁷ Wee Chala Uwamaka Ghosi utunyosekezye kukwako, icheni chako chitulamilaye, po tukwiza pakupokiwa.

⁸ Ukalunyunkulamo ulutabo lwamampesya mu Ijiputi, ukabefyamo abantu aba inko izinji nukulubyala mulamula.

⁹ Ukaghalimila umughunda amampesya ghala, po aghene ghakamela amagululuzi amibizu nkani, amagululuzi ghala ghakataba posi na posi pachisu.

¹⁰ Amaghamba ghakavwinka akazundila kache, isamba zyache zikavwinka amakwi amakulu agha mwale.

¹¹ Ghakatabila isamba zyache mupaka ku Nyanja iya Medeteleniya, mupaka kulusoko ulwa Yufuleti.

¹² Nkimba choni chicho walumongolannya ulupaso lwache, umwakuti bo abantu bosi babo bakudumusannya palapala bayabayepo ivikomwa vyache?

¹³ Ingulube izya munkolongo zikughakanyankila, po ivinyamana ivya muzi vikughalya.

¹⁴ Wee Chala Uwamaka Ghosi ghalabukila kukwitu, Ennya uko kumwanya, sungilila akiza ulumpesya lwako ulu.

¹⁵ Imigululuzi inyobe yako indilo yikabyala umwana yuyo wamulela wemwene.

¹⁶ Bachocha numoto, bachidumula, po ubakalalilaye abantu banaba nukubazimizya.

¹⁷ Loli ubanje nu muntu yuyo umughanite, umukazyanje umwana yuyo wamulela wemwene.

¹⁸ Po aswe te twepukeko kukwako, tupanje ubumi ukuti tulipalaye itabwa lyako bwila na bwila.

¹⁹ Wee Mwene u Chala Uwamaka Ghosi, tunyosekezye kukwako, icheni chako chitulamilaye, po tukwiza pakupokiwa.