Masalimo 8 - IBAYIBOLO 2024

Nizya buchindamu ubwa Chala, sona nu muchizi uwa muntu

Kumulongozi uwa bwimbi. Pakubombezya amapango ukumwimbila u Giti. Isalimo ilya Devedi.

¹ Wee Mwene, u Mwene witu, itabwa lyako likulu nkani pachisu chosi ichapasi! Ubuchindamu bwako bufikite ko kumwanya.

² Namapalo agha bana abanandi na babonda wazenga ilinga pachifukwa icha balwani bako; umwakuti ubasone imilomo bosi babo bakusambukiye.

³ Nanti nkwennya kumwanya, kuko ukakupela ni nyobe zyako, nu mwezi ni ntondwa vivyo uvibikite mubuzilo bwache.

⁴ Nkimba umuntu wewenu ukuti umukumbukaye? Umwana uwa muntu wewenu ukuti umusungaye akiza?

⁵ Ukamupela pakuba munandi nkani ukuchila u Chala, po ukamuvwika impumpu iya buchindamu nu muchizi.

⁶ Ukamubika pakuba mulaghili uwa mbombo zyosi izya nyobe zyako, nukuvibika vyosi vinivi kusi kunyayo zyache.

⁷ Ivintu vyache ngati vyo ivi: Ing'ozi ni ng'ombe sona ni vinyamana vyosi ivya munkolongo.

⁸ Ukavibika sona ni viyuni ivya mumwanya, niswi izya munyanja, kokuti vyosi vivyo vikusabagha munyanja.

⁹ Wee Mwene, u Mwene witu, itabwa lyako likulu nkani pachisu chosi ichapasi!