Masalimo 79 - IBAYIBOLO 2024

Ulwiputo ulwakubalabila abantu ubupoki

Isalimo ilya Asafu.

¹ Wee Chala, abantu aba inko izinji binjiye muchisu icha bantu bako, bayinyazya inyumba yako izelu, sona bakapelite akaya akakulu nkani aka Yelusalemu pakuba chisami.

² Imivimba iya babombi bako bayipela, pakuba chakulya icha viyuni, yope imivimba iya bantu bako abazelu, bayipela pakuba chakulya icha vinyamana ivya muchisu ichapasi.

³ Bakukupula ibanda mu Yelusalemu mosi ngati mizi, sona atalipo nayumoyumo umuntu uwakubasyila abafwe bala.

⁴ Twaba twe chintu ichakusekesya pakasi pa bapalamani bitu, sona abantu babo batuzyunguliye bakutuseka nukutobezya.

⁵ Wee Mwene, nkimba ukwiza pakutukalalila mupaka liyi? Fwandi ubuzuba bwako bukwiza pakwaka ngati moto mupaka liyi?

⁶ Ubapungulilaye ubukali bwako abantu aba inko izinji babo batakumenye. Ubupungulilaye ubukali bwako ubumwene bubo butakulichindika itabwa lyako.

⁷ Pakuti babaghogha abantu aba Yakobo, sona bachinangannya ichisu chabo.

⁸ Utakatufundaye pachifukwa icha mbibi izya banyenya bitu, po utupelelaye ichisa lubilolubilo, pakuti twisiwa nkani.

⁹ Wee Chala Umupoki witu twavwe, pachifukwa icha itabwa lyako ichindamu. Tupoke sona utuhobokelaye imbibi zyitu, pachifukwa icha itabwa lyako.

¹⁰ Nkimba choni chicho abantu aba inko izinji balalusyanje ukuti, “Nkimba u Chala wabo ali ko kwiyi?” Bo tukwennya na maso ghitu ubafundaye abantu aba inko izinji, pachifukwa icha kubaghogha ababombi bako.

¹¹ Ivwa ukukoloma ukwa bakayidi, sona ubapokaye ni nyobe yako iya maka babo babaghiye pakughoghiwa.

¹² Wee Mwene ubatanizyanje akaseveni abantu aba inko izinji, pachifukwa icha ntuko zizyo bakukusamula nazyo.

¹³ Po aswe twe bantu bako, twe mudimo uwa pakulyezyezyapo ivitekwa, tukwiza pakukupala bwila na bwila, sona tukwiza pakukupalagha mupaka inkulilo zyosi izya muntazi.