Masalimo 78 - IBAYIBOLO 2024

U Chala na bantu bache

Ukwinong'ona nkani Isalimo ilya Asafu.

¹ Mwee bantu bane, ivwa ichimanyisyo chane, teghelezya ku zizyo nkunena nu mulomo wane.

² Nkwiza pakunenela muvyili, nkwiza pakunena ivintu vivyo vifisiwe ukwanda kale.

³ Nkwiza pakunena ivintu vivyo twivuye nukuvimanya, sona vivyo abanyenya bitu batubuzizye.

⁴ Tutakwiza pakubavindapo nalumo abana babo, tukwiza pakuyibuzya inkulilo iya muntazi nizya mapalo ghagho ghamubaghiye u Mwene, na maka ghache sona ni viswigho vivyo abomba.

⁵ Akamupa indaghilo u Yakobo, sona akabapa amalamulo aba Izilayeli, ghagho akabalamula abanyenya bitu, ukuti babamanyisyanje abana babo,

⁶ umwakuti inkulilo izya muntazi zighamanye, po bope abana babo batapapiwe bababuzyanje abana babo.

⁷ Pakubomba bunubu, bamusubilaye u Chala, umwakuti batakaluvyanje zizyo ababombela, loli baghakonkaye amalamulo ghache akabalilo kosi.

⁸ Po batakabanje ngati banyenya babo, inkulilo yiyo yitakwivwila sona ni yakusambuka, abantu babo amoyo ghabo makafu kwa Chala, sona imizimu yabo te misubiliwa kwa Chala.

⁹ Aba Efulayimu babo bakaba nubwele munyobe zyabo, pisiku ilya bwite bakachimbila.

¹⁰ Batakasunga ulufingo ulwa Chala, loli bakakana pakulwivwila ululaghilo lwache.

¹¹ Bakaluvya ivintu vivyo akababombela, sona ni vyika vivyo akabalanjizya.

¹² Akabomba ivyika pamaso pa banyenya babo muchisu icha Ijiputi, muchigaba icha Zowani.

¹³ Akayigaba inyanja pakasi ukuti badumusannyepo. Akaghapela amizi ukuti ghimilile ngati lubumba.

¹⁴ Pamusanya akabalongolela ni bingu, loli pabusiku akabalongolela numoto.

¹⁵ Akabazula ilyalabwe munkolongo, akabapa amizi aghakung'wela aminji nkani ngati nyanja.

¹⁶ Akapela utusoko pilyalabwe, po akapela amizi ukuti ghendaye ngati lusoko.

¹⁷ Loli munkolongo mula bakendelela pakamunangila, bakamusambukila Uwakumwanya Nkani.

¹⁸ Mumoyo ghabo bakamuyela nkani u Chala ukuti abape ichakulya, chicho bakaba nacho nikwilu.

¹⁹ Po bakanena umwakususannya nkani nu Chala bakati, “Nkimba u Chala angatupa ichakulya munkulongo muno?

²⁰ Bo akoma ibwe lila amizi ghakafuluka, po zyope isoko zikenda nkani. Nkimba angatupa sona ichakulya? Nkimba angabapa abantu bache inyama?”

²¹ Bo u Mwene ivwa zinizi, akakalala nkani. Po umoto ghukaka pa Yakobo, ubukalale bwache bukaba pa Izilayeli

²² pachifukwa ichakuti batakamusubila u Chala pamo ukubusubila ubupoki bwache.

²³ Loli akalamula kumwanya, po inyiyi izya kumwanya zikighuka.

²⁴ U Chala akabawisizya umana, akabapa ivibama ivyakumwanya.

²⁵ Abantu bakalya ichakulya icha bantumi aba kumwanya, sona u Chala akabatumila ivyakulya ivyinji nkani.

²⁶ Akatuma impepo iyakubufumilo bwizuba iya kumwanya, po na maka ghache akatuma impepo iyakuntende.

²⁷ U Chala akabawisizya inyama inyinji ngati lufumbi, iviyuni vikaba vyinji ngati musesenga uwa mulubazu ulwamunyanja.

²⁸ Akaviwisizya pakasi pavisakasa vyabo, sona na posi pavisakasa

²⁹ Abantu bala bakalya mupaka bakikuta, pakuti akabapa vivyo bakaba navyo nikwilu.

³⁰ Loli bo ikwilu lyabo lichili litamalite, sona bachili batamilite ichakulya chila,

³¹ u Chala akabakalalila, po akabaghogha abantu bosi abamaka nkani. Akabaghogha abalumendo abiza nkani aba mu Izilayeli.

³² Napapo ivintu vyosi vikaba bunubu, abantu bala bakananga, sona bakavyennya iviswigho vyache, loli batakasubila.

³³ Po akaghadumulizya amasiku ghabo ukuti bazimile ngati muyi, akwiza pakughadumula amaka ghabo ukuti vyosi vimalile muntamyo.

³⁴ Nanti u Chala akubaghogha, abene bakamulondelezyanga. Bakapinduka nukumulondelezya u Chala nu moyo wabo ghosi.

³⁵ Bakamukumbuka ukuti u Chala akaba lyalabwe lyabo, u Chala Uwakumwanya Nkani we mutabuli wabo.

³⁶ Loli abene bakaba basubiliwa, bakatamanta pakunena ubumyasi.

³⁷ Amoyo ghabo ghatakaba masubiliwa kukwache, batakasunga ulufingo lwache.

³⁸ Loli akaba wachisa, akabahobokela imbibi zyabo, po atakabanangannya, akabalilo na kabalilo akubwisya ubukali bwache, loli atakakalala.

³⁹ Akakumbuka ukuti abene bantu bulo, babo bali ngati mpepo yiyo yitakunyokela sona.

⁴⁰ Akinjikinji bulo bakamusambukila munkolongo mula, sona bakamukalalizya muchisu ichumizu chila.

⁴¹ Bakamuyela u Chala kabilikabili, bakamukalalizya Umuzelu uwa Izilayeli yula.

⁴² Bakaghaluvya amaka ghache, pisiku lilyo akabapoka munyobe izya balwani babo,

⁴³ pisiku lilyo akapela ivyika mu Ijiputi, sona ni viswigho vyache muchigaba icha Zowani.

⁴⁴ Isoko zyabo zikanduka pakuba libanda, umwakuti bakapotwa pakung'wela amizi agha musoko zilazila.

⁴⁵ Akabatumila imbwele zizyo zikabatamya nkani, sona bope abachula bakachinangannya nkani ichisu chabo.

⁴⁶ Akazyitikizya impazi ukuti zilyanje ivibyalwa vyabo, sona nukuti umakanta wepe alyanje inyinulo yabo.

⁴⁷ Akaghanangannya amaghunda ghabo agha mampesya ni vula iya mabwe, po ghope amakuyu akaghanangannya na mizi aghakwizula.

⁴⁸ Akazighogha ing'ombe ni vula iya mabwe, vyope ivitekwa akavighogha na kamesya.

⁴⁹ Akabawisizya umoto uwa bukali bwache, umoyo wache ghukababa nkani, po akabakalalila nukubawisizya intamyo, akatuma abantumi abakunangannya.

⁵⁰ Akabwefya ubukali bwache, akitikizya ukuti abantu bala bafwanje, po akabaghogha ni chiwaya.

⁵¹ Akabaghogha abakatote bosi aba muchisu icha Ijiputi, abakatote aba bantu muchisakasa icha Hamu.

⁵² U Mwene akabalongozezya abantu bache ngati vyo vitekwa, po akabefya munkolongo mula ngati zyo ng'ozi.

⁵³ Akabalongozya umwamutende, umwakuti batakanyilagha. Loli inyanja yikabibizya abalwani babo.

⁵⁴ Po akiza nabo pachisu chache ichizelu, pighamba papo inyobe yache iyamaka yikafyula.

⁵⁵ Akazichimbizya inko izinji pamaso papache. Akabapa sona ichisu pakuba mpyana yabo, po akabapa utwaya abaluko ulwa Izilayeli utwakwikalamo.

⁵⁶ Loli abantu bala bakamuyela u Chala Uwakumwanya Nkani bakamusambukila. Po batakaghakonka amalamulo ghache.

⁵⁷ Abene bakaba bakusambuka sona batakaba basubiliwa, loli bakanyongananyongana bulo ngati kalasilo akakunyongana.

⁵⁸ Bakamukalalizya u Chala nu buzilo bwabo ubwapamwanya, umwakuti bakamupela ukuti abanje nu buzuba ni vifwani vyabo.

⁵⁹ Bo u Chala abivwa, akakalala nkani, po akabakana aba Izilayeli.

⁶⁰ Akepamo mubuzilo bwache ubwakwikalamo mu Shilo. Ichisakasa chache chikite pakasi pabantu.

⁶¹ Akabitikizya kuti balifyule Ibokosi ilya Lufingo, akabubika ubuchindamu bwache munyobe izya balwani.

⁶² Akabakalalila nkani abantu bache, po akitikizya ukuti baghoghiwe na balwani babo.

⁶³ Umoto ghukabalungulizya abana babo abalumendo, po abana babo abalindu batakaba na bantu abakubimbila palusekelo lwasendwa.

⁶⁴ Abaputi babo bakaghoghiwa nupanga, umwakuti abachi babo abafwilwe batakabitikizya pakubalila.

⁶⁵ Pabulamilo u Mwene akaba ngati alamusya bulo mutulo, ngati po muntu uwamaka yuyo akukolomoka pachifukwa icha kukolwa.

⁶⁶ U Mwene akabachimbizya abalwani bache, akabakozya isoni akabalilo kosi.

⁶⁷ Akabakana abaluko ulwa Yosefu, atakabasala abaluko ulwa Efulayimu.

⁶⁸ Loli akalusala uluko ulwa Yuda, akasala sona Ighamba ilya Ziyoni lilyo alighanite.

⁶⁹ Akazenga ubuzilo bwache ubuzelu ngati buzilo bwache ubwa kumwanya, ngati chisu ichapasi chicho chikalanite bwila na bwila.

⁷⁰ Akamusala umubombi wache u Devedi, akamusenda kuko akadimagha ing'ozi.

⁷¹ Akamusenda kuko akadimagha ing'ozi ukuti abanje mudimi uwa luko ulwa Yakobo, u Izilayeli, ichilingo chache.

⁷² Akazidimagha nu moyo wache umugholosu, po akabalongozya akiza.