Masalimo 77 - IBAYIBOLO 2024

Ukusangalusya pakabalilo akantamyo

Kumulongozi uwa bwimbi. Ukumwimbila u Yedutuni. Isalimo ilya Asafu.

¹ Nkumulilila u Chala ukuti anyavwe, sona nkukolomoka kwa Chala ukuti anyivwe.

² Bo indi muntamyo nkamulondelezya u Mwene, pabusiku intakalita pakukwezya inyobe zyane ghope umoyo wane ghutakalonda pakusangalusiwa.

³ Wee Chala, nkakukumbuka, sona nkakolomoka, nanti nkwinong'ona nizya yuyo, nkuwa amaka.

⁴ Akampela ukuti nchelezya busiku bosi, sona nkaba muntamyo inkulu nkani, umwakuti nkapotwa na pakunena bulo.

⁵ Nkinong'ona nizya masiku aghakale, nizyamaka ghagho ghendapo.

⁶ Nkazikumbuka inyimbo zyane zizyo nkimbagha pabusiku, nkilalusya nukwibuzikizya nkani mumoyo wane ukuti:

⁷ “Nkimba u Mwene akwiza pakutukana bwila na bwila? Fwandi atakwiza pakumpelela sona ichisa?

⁸ Nkimba ulughano lwache lulo lutakupotwapo nalumolumo, lukwiza pakuzimila bwila na bwila? Nkimba ilayizyo lyache likwiza pakupotwa akabalilo kosi?

⁹ Fwandi u Chala aleka pakuba ni chisa? Nkimba aleka pakuba ni chililizi pachifukwa icha bukali?”

¹⁰ Po nkati, “Chicho chikumbaba chakuti, U Chala atakulanjizya sona amaka ghache.”

¹¹ Nkwiza pakuzikumbuka imbombo izya Mwene, naloli nkwiza pakuvikumbuka ivyika vyako ivyakale.

¹² Izyinong'onaye imbombo zyako zyosi zizyo wabomba. Izyinong'onaye sona ni mbombo zyako izyamaka zizyo wabomba.

¹³ Wee Chala izila zyako zelu. Nkimba alipo sona uchala uyunji umukulu ngati witu?

¹⁴ Awe we Chala wewe ukupela ivyika, ukulanjizya amaka ghako pakasi pa inko.

¹⁵ Ukubapoka abantu bako ni nyobe yako iyamaka, kokuti bo baluko ulwa Yakobo nu Yosefu.

¹⁶ Wee Chala, amizi ghakakwennya, bo amizi ghakwennya bulo ghakaba nubogha, naloli inyanja inyibizu nkani yikatetema mupaka pasi.

¹⁷ Amabingu ghakakupula amizi, sona kumwanya kukajilimisya, po utumesya tukaba kosi na kosi.

¹⁸ Ukupaya kwako kukivwika mukankungu, kope akamesya kakanyampana pachisu ichapasi, po ichisu ichapasi chikatetema nukuyingana.

¹⁹ Ukadumusannya pamayigha aghamaka nkani, izila yako yikenda pamizi amibizu, pope bulo ukudindiwa ukwanyayo zyako kutakaboneka.

²⁰ Ukabalongozya abantu bako ngati zyo ng'ozi, pakwendela mwa Mozesi nu Aloni.