Masalimo 75 - IBAYIBOLO 2024

U Chala we umulongi

Kumulongozi uwa bwimbi. Ukuyana nu lwimbo ulwakuti, “Utakanangannye.” Isalimo ilya Asafu Ulwimbo.

¹ Wee Chala tukukupalizya, tukukupalizya pakuti itabwa lyako lili papipi, sona abantu bakufumusya nizya mbombo zyako izyakuswighisya.

² Ukuti, “Nkukasala akabalilo akenecho, nene nkulongela mubwanaloli.

³ Bo ichisu ichapasi chikuyingana, sona bo abantu bakutetema, nene nkuchilema nukuzikazya impanda zyache.

⁴ Nkubabuzya abantu abakwituvya nkuti, ‘Mutakituvyanje sona,’ bope abantu ababibi nkubabuzya nkuti, ‘Mutakitutumulaye sona.

⁵ Mutakitutumulaye pachifukwa icha maka ghinyu, pamo pakunena umwakwituvya.’ ”

⁶ Atalipo umuntu nayumoyumo uwa kubufumilo bwizuba, pamo uwa kubwinjililo, pamo uwa munkolongo, yuyo angamukwezya umuntu.

⁷ Loli we Chala yuyo akudumula inongwa, akumwisya yumo nukumukwezya uyunji.

⁸ U Mwene alemite ulubako munyobe, lulo lwizuye nu vinyo uwa itatafula umongannye ni vyakunonezya ichakulya. Akumupungula, po abantu ababibi bosi aba muchisu ichapasi bakung'wela, bakung'wela wesi mupaka pamasika.

⁹ Loli ane nkwiza pakuzifumusya zinizi bwila na bwila, nkwiza pakumwimbilagha amapalo u Chala uwa Yakobo.

¹⁰ Nkwiza pakuzidumula impembe izya bantu bosi ababibi, loli nkwiza pakuzikwezya impembe izya bantu abagholosu.