Masalimo 74 - IBAYIBOLO 2024

Ukubiputila abantu aba inko zyache ukuti bapone ku inko izinji

Ukwinong'ona nkani Isalimo ilya Asafu.

¹ Wee Chala, nkimba choni chicho watuleka twebene bwila na bwila? Nkimba ubukali bwako bukwaka ngati moto pa ng'ozi zyako?

² Ubakumbukaye abantu bako babo ukisalila wemwene kale, abantu babo ukabatabula, ukuti babanje bachilingo chako. Ulikumbukaye Ighamba ilya Ziyoni papo ukikalagha.

³ Wendelaye ivisami vyako ivya bwila na bwila. Abalwani banangannya ivintu vyosi mubuzilo bwako ubuzelu.

⁴ Abalwani bako bakolomoka mu Nyumba iya Chala. Basimika indembela zyabo pakuba chimanyilo ichakuti bapota.

⁵ Pamulyango uwapamwanya pakuboneka ngati po umuntu adumulapo isamba izya makwi inyumizu.

⁶ Amatabwa ghache ghosi ghabiziwa akiza nkani, bo bakughabazulannya ni ntemo sona ni nyondo.

⁷ Bakabocha ubuzilo bwako ubuzelu, babuwisizye pasi ubuzilo bwako nukubunyazya.

⁸ Po bakanena mumoyo ghabo bakati, “Twende tubapote!” Po bakabocha Ubuzilo Ubuzelu bosi mumo bakamwiputilaghamo u Chala muchisu chila.

⁹ Ivimanyilo vyitu vitakuboneka. Atalipo sona umulaghuzi uwakusyalapo, nayumoyumo umuntu pasi papinyu yuyo azimenye mumo zikwiza pakubela.

¹⁰ Wee Chala, nkimba abalwani bitu batusekaye mupaka liyi? Nkimba balisamulaye itabwa lyako bwila na bwila?

¹¹ Nkimba choni chicho utakulanjizya amaka ghako? Nkimba choni chicho wiyumbatite?

¹² Loli awe Chala we mwene wane ukwanda kale, wewe ukwiza nu bupoki pachisu.

¹³ Na maka ghako ukayigaba inyanja, ukayifwantannya imitu iya nyivwila izyakoghofya munyanja

¹⁴ Ukayifwantannya imitu iya nyivwila, po ukachibika pakuba chakulya icha vinyamana ivya munkolongo.

¹⁵ Ukighula imbwibwi ni soko ukuti zyendaye, tope utusoko ukatukamula.

¹⁶ Umusanya wako sona bope ubusiku bwako, po ukabika umwezi ni zuba mubuzilo bwache.

¹⁷ Ukagaba impaka izya chisu, po ukapela sona ichisiku nu lupepo.

¹⁸ Wee Mwene kumbuka namumo umulwani akobezezya, sona namumo abantu abapunganu balisamulila itabwa lyako.

¹⁹ Utakavipanje umoyo uwa nkunda ivinyamana ivya munkolongo. Utakabuluvyanje ubumi ubwa bantu bako abapina bwila na bwila.

²⁰ Kumbuka ulufingo lulo ukafingana naswe, pakuti ichisu chizuye na bantu aba muchisi.

²¹ Utakabakozyanje isoni abantu abakuyiviwa. Abapina na bantu abakusobelwa balipalaye itabwa lyako.

²² Wee Chala vundumuka, iyimila inongwa yako, sona ukumbukaye namumo abapunganu bakukobezekezya isiku lyosi.

²³ Utakachiluvyanje ichongo icha balwani bako, ukuzuma ukwa balwani bako kukulilakulila.