Masalimo 73 - IBAYIBOLO 2024

Ibuku Ilyabutatu Masalimo 73-89 Ubwanaloli ubwa Chala

Isalimo ilya Asafu.

¹ Naloli u Chala mwiza kuba Izilayeli, ku bantu babo bali na moyo aghakufikapo.

² Loli inyayo zyane zikaba papipi pakutyelemuka, sona nkaba papipi pakuwa.

³ Pakuti nkaba nakabini na bantu abakwituvya, bo nkubennya ababibi ukuti ivintu vikubendela akiza.

⁴ Batakukomana nintamyo, sona amabili ghabo ghinite sona ghali na maka.

⁵ Batakuyimba napo panandi ngati mumo bakuyimbila abanji, sona batakukomana nintamyo ngati bantu abanji.

⁶ Cho chifukwa bakuvwala amituvyo ngati gho mambo musingo, bakuvwala ivyongo ngati nkazo.

⁷ Imbatiko imbibi zikufuma munyinong'ono zyabo, mumoyo ghabo mukufuma ububibi bwene.

⁸ Bakubobezya abanji, pakuyeba, abene bakwituvya nukubakanyilila abantu.

⁹ Amalomo ghabo ghakumusamula u Chala kumwanya, lope ululimi lwabo lukwendakwenda bulo pachisu ichapasi.

¹⁰ Ichi cho chifukwa abantu bakupindukila kukwabo, po bakwikuta ni neno zyabo ngati mizi aghakung'wela.

¹¹ Bakuti, “Nkimba u Chala angazimanya bulibuli? Nkimba Uwakumwanya Nkani ali na mahala?”

¹² Umu momumo ababibi babeleye, akabalilo kosi bali pabwiza, bakukabilakabila bulo ichuma.

¹³ Naghuswefya umoyo wane pabulo, nasukusula pabulo munyobe ukulanjizya ukuti inte ni mbibi.

¹⁴ Pakuti akabalilo kosi nkuyimba, sona indabindabi yili yosi nkufundiwa.

¹⁵ Nanti nkatinji inenaye bunubu ngali inte ne wanaloli ku bantu bako.

¹⁶ Loli bo nkwinong'ona zinizi ukuti nivwisye akiza nkagha ukuti fundo nkulu.

¹⁷ Po nkinjila Mubuzilo Ubuzelu ubwa Chala, po nkabumanya ubumalilo ubwa bantu ababibi.

¹⁸ Naloli wababika pabutyelemuke, po ukubawisya mupaka bananganike.

¹⁹ Mukabalilo akapimpa bulo bakuzimila, bakuzimila bosi nu bufwe ubwakoghofya.

²⁰ Wee Mwene, ukwiza pakubachimbizya abantu banaba, ngati muntu yuyo akulota, akuvisamula ivilota vyache pandabindabi

²¹ Bo nkuyimba ni nyinong'ono, sona bo umoyo wane wavulala,

²² nkaba ne mupunganu nu musita mahala, nkaba ne chinyamana bulo kukwako.

²³ Loli akabalilo kosi indi poka nawe, ukundema inyobe indilo.

²⁴ Ukundongozya na mahala ghako, sona pabumalilo ukumpokela mu buchindamu bwako.

²⁵ Nkimba indi nu wenu uko kumwanya, loli wewe wemwene? Patalipo nachimochimo pachisu ichapasi chicho nkulonda, loli awe wemwene.

²⁶ Umubili wane nu moyo wane vingapotwa, loli u Chala we maka agha moyo wane, po akugabilagha ulusayo bwila na bwila.

²⁷ Abantu bosi babo bali kubutali nawe bazimilaye. Pakuti ukubazimizya abantu bosi babo te basubiliwa kukwako.

²⁸ Loli kukwane chiza ukuti mbanje papipi nu Chala, nakusala we Mwene Uwamaka Ghosi ukuti ubanje we buzilo bwane ubwakuvwamamo, sona nkwiza pakubapangila abanji nizya mbombo zyako zyosi.