Masalimo 72 - IBAYIBOLO 2024

Ukumwiputila u mwene

Isalimo ilya Solomoni.

¹ Wee Chala, umupanje u mwene amahala aghakulongela, sona umupanje umwana uwa mwene umoyo ghugho ghubughanite ubugholosu.

² Po akwiza pakubalongela abantu bako mubwanaloli, sona atakwiza pakwennya icheni nanti akulonga inongwa izya bapina.

³ Amaghamba ghakwiza pakubizila abantu numutende, utughamba tope tukwiza pakwiza ni seke izya bugholosu.

⁴ Akwiza pakubimila abapina, nukubapoka abana aba bapotwe, loli akwiza pakubayivya babo bakubayivya abamwabo.

⁵ Akwiza pakuba nubumi bo izuba nu mwezi vichili vikulama kumwanya, mupaka inkulilo zyosi izya muntazi.

⁶ Akwiza pakuba ngati vula yiyo yikutima pamaghunda, sona ngati vula iyakusalasata pachisu.

⁷ Pakabalilo kache umugholosu akwiza pakubako, sona ivintu vikwiza pakwenda akiza nkani mupaka umwezi ghuleke pakulama.

⁸ Akwiza pakulaghila ukwandila ko kunyanja mupaka ku kunyanja inkulu nkani, sona ukwandila ko kulusoko ulwa Yufuleti mupaka kubumalilo ubwa chisu ichapasi.

⁹ Abantu aba inko izya munkolongo bakwiza pakumufughamilila, sona abalwani bache bakwiza pakulumyanta ulufumbi.

¹⁰ Abamwene aba mu Talishishi naba pa tusungo, bakwiza pakusonkela umusonko kukwache, sona abamwene aba mu Sheba naba mu Seba bakwiza pakwiza ni vyabupi.

¹¹ Abamwene bosi bakwiza pakumufughamilila, sona bope abantu aba inko zyosi bakwiza pakumubombela.

¹² Pakuti akwiza pakubapoka abapotwe babo bakumwitizya, sona abapina babo bate nu wakubavwa nayumoyumo.

¹³ Akwiza pakubapelela ichisa abadedebazu na bapotwe, sona akwiza pakubapoka abapina kubufwe.

¹⁴ Akwiza pakubapoka munyobe izya bantu babo bakubayivya na bavyongo, pakuti ibanda lyabo cho chintu icha pamwanya pamaso papache.

¹⁵ U mwene abanje nubumi ubutali, sona abantu bamupanje ugolide uwamu Sheba. Abantu bamwiputilaye akabalilo kosi, nukumusaya isiku lyosi.

¹⁶ Muchisu chosi mubanje ni vyakulya ivyinji nkani, sona na pamwanya patughamba bulo pope pabanje ivintu ivyinji nkani. Ivikomwa vyache vyelaye nkani ngati vikomwa ivya mu Lebanoni, sona abantu bache aba mukaya akakulu nkani banyamaye ngati lisote.

¹⁷ Itabwa lyache libanjeko bwila na bwila, sona libanjeko ngati mumo izuba likubelaghako. Abantu aba inko zyosi bakwiza pakusayiwa ukwendela mumwache, sona bakwiza pakumwitizya ukuti musayiwa.

¹⁸ U Mwene u Chala uwa ba Izilayeli apaliwanje, weyuyo mwene akubomba ivyakuswighisya.

¹⁹ Itabwa lyache lichindamu, lipaliwanje bwila na bwila, sona ichisu chosi ichapasi chizulaye nu buchindamu bwache. Ameni nu Ameni.

²⁰ Ubu bo bumalilo ubwa nyiputo izya Devedi umwana uwa Yese.