Masalimo 71 - IBAYIBOLO 2024

Ulwiputo ulwa muntu umughosi

¹ Wee Mwene, awe we buzilo bwane ubwakuchimbililako. Utakitikizyanje nalumo ukuti nkoziwe isoni.

² Unyavwe nukunvighilila pakuti we mugholosu. Unteghelezye ukuti unyivwe nukumpoka.

³ Ubanje we lilinga lyane ilyakuvwamilamo, kuko ningabukako akabalilo kosi. Lamula ukuti umpoke pakuti we lyalabwe lyane ni linga lyane.

⁴ Wee Chala wane mpoka munyobe izya bantu ababibi, sona mpoka kumaka agha bantu babo te bagholosu, sona babo bali na moyo amakafu.

⁵ Wee Mwene Uwamaka Ghosi, ulusubilo lwane luli mumwako, sona nakusubiye ukwanda ko kubwana bwane.

⁶ Nakusubiye wewe ukwanda ko kupapiwa kwane, pakuti wewe ukanyefya mulwanda ulwamayi wane. Po nkwiza pakukupala bwila na bwila.

⁷ Naba ngati chintu ichakuswighisya abantu abanji, loli awe we buzilo bwane ubwakuvwamilamo nkani.

⁸ Umulomo wane ghukukupala, sona nkufumusya nizya ubuchindamu bwako akabalilo kosi.

⁹ Utakankanaye, bo naghosipa, sona utakandekaye nemwene, bo amaka ghane ghamala.

¹⁰ Pakuti abalwani bane bakulonda pakungogha, bope abantu babo bakulonda pakungogha, bakwivwana ichakubomba.

¹¹ Bakuti, “U Chala amulekite mwene. Po zagha tumuchimbizye nukumulema, pakuti atalipo nayumoyumo umuntu uwakumupoka.”

¹² Wee Chala, utakabanje nane kubutali, wee Chala wane, zagha lubilolubilo unyavwe.

¹³ Abantu babo bakusunsya bazimilaye pachifukwa icha soni, sona bope babo bakulonda pakunvulazya, basamuliwanje nukukoziwa isoni.

¹⁴ Loli ane nkwiza pakukusubila akabalilo kosi, sona nkwiza pakukupala akinjikinji bulo.

¹⁵ Umulomo wane ghukwiza pakubapangila abanji nizya bugholosu bwako, sona nizya bupoki bwako isiku lyosi akabalilo kosi, napapo bukulu nkani ukuchila akivwisizye kane.

¹⁶ Wee Mwene Uwamaka Ghosi, nkwiza pakufumusya nizyamaka ghako amakulu, sona nkwiza pakulumbilila nizya bugholosu ubwako nu bwako.

¹⁷ Wee Chala, wamanyisya ukwanda bo bwana bwane, po mupaka nilelo bulo nkulumbilila nizya mbombo zyako izyakuswighisya.

¹⁸ Wee Chala, napapo ne mughosi sona ivwi zyawa, utakandekaye nemwene. Po nkwiza pakulumbilila nizyamaka ghako mupaka inkulilo iya muntazi, sona nizyamaka ghako ku bosi babo bakwiza pakupapiwa muntazi.

¹⁹ Wee Chala, ubugholosu bwako bwafika mupaka ko kumwanya, sona wabomba ivintu ivikulu nkani, Wee Chala, nkimba wewenu ayanite nawe?

²⁰ Napapo wantumila intamyo sona ni vyakubaba, loli ukwiza pakumpa sona amaka. Po ukwiza pakunyefyamo muchiliba ichibizu nkani.

²¹ Ukwiza pakunyonjelezya sona umuchizi wane, po ukwiza pakunsangalusya sona.

²² Wee Chala, nkwiza pakukupala pakulizya ichinanda, pakuti we musubiliwa. Nkwiza pakukwimbila inyimbo izya mapalo pakubombezya ipango, pakuti awe we Muzelu uwa Izilayeli.

²³ Umulomo wane ghukwiza pakukolomoka pachifukwa icha buhobosu, bo nkukwimbila inyimbo izya mapalo. Ghope umoyo wane ghugho ukaghupoka ghukwiza pakukwimbila.

²⁴ Ululimi lwane lukwiza pakubapangila abanji isiku lyosi nizya mbombo zyako ingolosu, pakuti abantu babo bakulonda pakunvulazya bakoziwa isoni, sona bavulunganite.