Masalimo 7 - IBAYIBOLO 2024

Ulwiputo ulwakulaba ubwanaloli

Ulwimbo ulwapachililo ulwa Devedi, lulo akamwimbila u Mwene pachifukwa icha Kushi uwa luko ulwa Benjamini.

¹ Wee Mwene, Chala wane, nkuchimbilila kukwako, umpokaye munyobe izya bosi babo bakunchimbizya.

² Lumo banganzepulannya ngati mumo inkalamu yikuzepulila inyama, nukunyonkolannya ukusita umuntu nayumoyumo uwakumpoka.

³ Wee Mwene Chala wane, nanti namunangila umuntu yumo, pamo nanti inyobe zyane zyizuye nu bubibi,

⁴ nanti namubombela akabibi umumanyani wane, pamo nanti namwibila chimo umulwani wane umwakusita ichifukwa,

⁵ po umulwani wane anchimbizyanje nukundema, ankanyankile pasi nukungogha, sona ansyile mwipumpa.

⁶ Wee Mwene, vundumuka mubukalale bwako, nyamuka umwakuti ulwanje na balwani bane abakali. Wee Chala wane lamusya, umwakuti ulongelaye mubwanaloli.

⁷ Uzibungannye inko ukuti zikuzyungulilaye, po uzilongaye bo wikaye pachitengo chako kumwanya.

⁸ U Mwene azilongaye inko zyosi. Wee Mwene undongaye ukuyana nu bugholosu bwane, Wee Wakumwanya Nkani undongaye ukuyana nu bwiza bwane.

⁹ Wee Chala umugholosu, we uzimenye inyinong'ono nu moyo uwa muntu, zimizya imbombo izya bantu ababibi, sona ubikazyanje abagholosu.

¹⁰ Ingulu yane we Chala, yuyo akubapoka babo bali na moyo amagholosu.

¹¹ U Chala we mulongi umugholosu, we Chala yuyo akubakalalila abantu ababibi isiku ni siku.

¹² Nanti umuntu atakuzileka imbibi zyache, u Chala akwiza pakupyasya upanga wache, nukuwesa ubwele bwache.

¹³ Ayanizye kale ivilwilo vyache ivipalapala nkani, sona nu tulasilo twache utwakwaka umoto.

¹⁴ Naloli umubibi akwinong'onagha bobibi, sona imbombo yache ko kupela intamyo nukubazimbula bulo abantu.

¹⁵ Akukumba ichiliba ichibizu nkani, loli weyuyo akuwilaghamo.

¹⁶ Intamyo zizyo akubapelela abanji, zikumuwila mwene, sona ivyongo vivyo akunyamusya vikuba pamutu wache.

¹⁷ Nkumupalizya u Mwene pachifukwa icha bwanaloli bwache, sona nkwiza pakumwimbilagha inyimbo izya mapalo u Chala Uwakumwanya Nkani.