Masalimo 69 - IBAYIBOLO 2024

Ulwiputo ulwa muntu uwa muntamyo

Kumulongozi uwa bwimbi. Ukuyana nu lwimbo ulwakuti, “Ubwezya ubwa mumizi.” Isalimo ilya Devedi.

¹ Wee Chala, mpoka, pakuti amizi ghafika musingo.

² Nkudwiba mumatope mumo pate na pakukanyapo, Nadwiba mumizi amibizu nkani, sona amayigha ghope ghakundwibizya.

³ Nadedebaye pachifukwa icha kulila, sona kusingo kope kumiye. Amaso ghane ghakwennya akafobela, bo nkulindilila u Chala wane.

⁴ Abakumbenga binji nkani ukuchila isisi izya kumutu wane, sona abalwani bane babo bakulonda pakungogha binji nkani, umwakuti banfyengite bulo pakunyosezya papo ichintu chicho intibite?

⁵ Wee Chala, ubumenye ubupunganu bwane, sona ukunanga kwane kope kuli pabuzelu pamaso papako.

⁶ Wee Mwene Uwamaka Ghosi, abantu babo bakusubiye batakakoziwanje isoni pachifukwa icha nene. Wee Chala, uwa ba Izilayeli, abantu babo bakukulondelezya batakakoziwanje isoni pachifukwa icha nene.

⁷ Pakuti natukiwa pachifukwa icha wewe, umwakuti indi ni soni nkani

⁸ Ane naba ngati po ne muyeni pakasi pa bakamu bane, sona ngati po ne mwendazila pakasi pa bawamwitu.

⁹ Pakuti ulweke lwane pa Nyumba yako lukwaka mumwane ngati moto, umusamu ghugho bakakusamula nagho, ghukangwila.

¹⁰ Bo nkwifunda nemwene pakutuzya pakulya, abantu bakunsamula.

¹¹ Bo nkuvwala amasaka pakulanjizya ichitima, pope bulo abantu bakunseka.

¹² Abantu babo bikaye pamulyango uwa lupaso bakunjeba. Sona abaching'wela bope bakunyimba munyimbo zyabo.

¹³ Wee Mwene, loli nkwiputa kukwako, ukuti umpelele ichisa, unyamule pakumpoka pakuti ulughano lwako lukulu.

¹⁴ Umpoke ukuti intakadwibe mumatope, umpoke munyobe izya babo bakumbenga, sona na kumizi amibizu nkani.

¹⁵ Utakitikizyanje amizi aghakwizula ukuti ghandwibizye, pamo ukuti inyanja inyibizu yindwibizye, pamo ukuti ninjile mwipumpa.

¹⁶ Wee Mwene unyamule, pakuti we mwiza, sona we walughano. Unyavwe pakuti ichisa chako chikulu nkani.

¹⁷ Utakamupanje inkonto ne mubombi wako. Unyamule lubilolubilo pakuti indi muntamyo.

¹⁸ Palamila umpoke, sona umpoke munyobe izya balwani bane.

¹⁹ Uzimenye mumo abantu bakunsamulila nukunkozya isoni, sona abalwani bane bosi ubamenye.

²⁰ Umusamu ghunughu wanvulazya nkani mumoyo, sona na maka ghope ghangwiliye. Nkalondagha nkani ngali umuntu yumo ampelele ichisa, loli intakamwaghapo nayumoyumo. Nkalondagha nkani ngali abantu bansangalusya, loli atakabapo umuntu nayumoyumo.

²¹ Bakambikila akanyongo muchakulya, sona bo indi ni nyota bakampa uvinyo umusape.

²² Ichakulya chicho chili pitebulo lyabo chibanje chipingo chabo, sona ulusekelo lwabo uluzelu lubalemaye.

²³ Amaso ghabo ghennyanje akafobela, umwakuti batakennyanje sona, zyope inyuma zyabo zipetamaye bwila na bwila.

²⁴ Ubapungulilaye ubukali bwako, sona ubukali bwako ubwakwaka bubalungulizyanje.

²⁵ Yileke inyumba yabo yibanje chisami, nayumo umuntu atakikalayemo.

²⁶ Pakuti babavwimagha abantu babo wabafunda, sona bakughanena amayimba agha bantu babo wabavulazya.

²⁷ Bonjelezye ulufundo pamwanya pa lufundo, sona utakabitikizyanje ukuti basendepo ichigaba pabugholosu bwako.

²⁸ Ughazimye amatabwa ghabo mwibuku ilya bumi, sona batakasimbiwanje poka na bantu abagholosu.

²⁹ Loli ane nkuyimba nkani sona nkwivwa ububavu, wee Chala unvighililaye nu bupoki bwako.

³⁰ Nkwiza pakulipala itabwa ilya Chala pakumwimbila ulwimbo, sona nkwiza pakufumusya nizya bukulu bwache pakumupalizya.

³¹ Zinizi zikwiza pakumuhobosya nkani u Mwene, ukuchila pakubika ichakwiyipa icha nkambaku iya mpembe niya nyayo.

³² Abapina bazyennyanje zinizi nukuhoboka, sona mwebosi mwe mukumulondelezya u Chala, mujimbaye amoyo.

³³ Pakuti u Mwene akubivwa abapotwe, sona atakubapa inkonto babo bali mujele.

³⁴ Kumwanya ni chisu ichapasi, ni nyanja sona na vyosi vivyo vili mumo, vimupalaye.

³⁵ Pakuti u Chala akwiza pakumupoka u Ziyoni, akwiza pakutuzenga sona utwaya utukulu nkani utwa mu Yuda. Po abantu bakwiza pakusamilamo nukwikala mulamula.

³⁶ Abana aba babombi bache bakwiza pakuchipyana, sona babo balighanite itabwa lyache bakwiza pakwikala mulamula.