Masalimo 68 - IBAYIBOLO 2024

Ulwimbo ulwabupoti ulwa ba Izilayeli

Kumulongozi uwa bwimbi. Isalimo ilya Devedi. Ulwimbo.

¹ U Chala avundumukaye, abalwani bache banyampanaye, sona bosi babo bakubengite bachimbilaye pamaso papako.

² Ubaputaye ngati mumo impepo yikuputila ilyosi, banangannye ngati mumo impula likusungunukila pamoto.

³ Loli abagholosu bahobokaye, sona basekelaye pantazi pa Chala, naloli basekelaye pachifukwa icha kuhoboka.

⁴ Mumwimbilaye u Chala, mulipalaye itabwa lyache pakwimba inyimbo. Mumukwezyanje yuyo akwelite pamabingu, yuyo itabwa lyache we Mwene, po musekelaye pamaso papache.

⁵ Uwise uwa balanda, sona nu muvighilili uwa bakolo abafwilwe, we Chala yuyo akwikala mu Nyumba yache izelu.

⁶ U Chala akubapa babo bali bene bulo ubuzilo ubwakwikalapo, sona akubefya abakayidi mujele nukubapa umutende. Loli abantu abakusambuka akubachimbizizya kuchisu ichumizu.

⁷ Wee Chala, ukabalongozya abantu bako, bo ukwenda munkolongo mula.

⁸ Po ichisu ichapasi chikayingana, sona kumwanya kukatimizya ivula, pamaso pa Chala, yuyo we Chala uwa lighamba ilya Sinayi, sona pamaso pa Chala uwa ba Izilayeli.

⁹ Wee Chala, ukatimizya ivula inyinji pachisu ichapasi, po ichilingo chako chicho chikaba chumizu chikanyokelamo sona.

¹⁰ Wee Chala, abantu bako bakikalana mulamula, sona ukabapa abapina ivintu ivyinji nkani.

¹¹ U Chala akunena amazyu, po ichilundilo icha babo bakalumbilila zinizi chikaba chikulu nkani.

¹² Bakati, “Mwebaya, abamwene na basilikali bakuchimbila, sona muvisakasa abantu bakugabana ivintu vivyo bakafyula.

¹³ Ivintu ivyakufyula vila vikuboneka ngati vipapande ivya nkunda, vivyo vipakiwe nu siliva, sona ghope ameya ghache ghapakiwe nu golide uwakunyezimila.”

¹⁴ Pakabalilo kako Uwamaka Ghosi akabanyampannya abamwene muchisu, bakaboneka ngati we kabefu pighamba ilya Zalimoni.

¹⁵ Wee lighamba ilya Bashani, we lighamba ilya buchindamu, sona we lighamba itali nkani.

¹⁶ Wee lighamba ilya tusonga, nkimba choni chicho ukulyennya na kabini ighamba, lilyo u Mwene akalisala ukuti alaghilayepo nukwikalapo bwila na bwila?

¹⁷ U Chala ali ni ngolo izya bwite inyinji nkani, sona u Mwene ika pighamba ilya Sinayi po iza kubuzilo bwache ubuzelu.

¹⁸ Bo akukwela kumwanya, ukabalongolela abakayidi abanji, po abantu bakakupa ivyabupi ivyinji nkani. Bope abantu abakusambuka bakakupa ivyabupi, umwakuti awe we Mwene u Chala wikalayemo.

¹⁹ U Mwene u Chala Umupoki witu apaliwanje, yuyo akunyamula intamyo isiku ni siku.

²⁰ U Chala witu we Chala yuyo akupoka, sona we Mwene Uwamaka Ghosi yuyo akutupoka kubufwe.

²¹ Naloli u Chala akwiza pakughatizannya amafupa agha balwani bache, babo bakwituvikizya imbibi zyabo.

²² U Mwene akuti, “Nkwiza pakwiza na balwani bane ukufuma ku Bashani, nkwiza pakubanyosezya munyanja inyibizu.

²³ Po mukwiza pakuzisukuzya inyayo zyinyu mwibanda ilya balwani binyu, sona imbwa zyinyu zikwiza pakumyanta mumo zingalondela.”

²⁴ Wee Chala, akabukatila aka bantu bako babo bakwenda nu muchisi kakuboneka, akabukatila aka bantu aba Chala wane sona naka Mwene wane kali Mubuzilo Ubuzelu.

²⁵ Abimbi balongoleye, sona abakulizya ivyakwimbila bali kwisinda, bo abalindu bakulizya ivisekeseke bali pakasi.

²⁶ Mumupalaye u Mwene palukomano ulukulu, sona mumupalaye u Mwene palukomano ulwa ba Izilayeli.

²⁷ Pantazi papabo pali uluko ulunandi ulwa Benjamini, pisinda papabo pali amakambala agha luko ulwa Yuda, po pisinda papabo pali amakambala agha luko ulwa Zebuloni nulwa Nafutali.

²⁸ Wee Chala, lanjizya amaka ghako, bika pabuzelu amaka ghako, ngati mumo ukabombela pakwanda.

²⁹ Pachifukwa icha Nyumba yako mu Yelusalemu, kulakula abamwene bakwiza pakukupa ivyabupi.

³⁰ Uvichemelaye ivinyamana vivyo vikwikala muntete, uludimo ulwankambaku zizyo zili mukasi mu ngwata. Bakanyankilaye abantu babo bakunyonywa ivyakufyula pabwite banyampannye abantu aba inko babo babughanite ubwite.

³¹ Aba Ijiputi bamwizilaye ni vyabupi u Chala, bope aba Etiyopiya bakomaye inkufi bo bakwiputa.

³² Mwee bamwene aba pachisu ichapasi, mumwimbilaye u Chala, mwimbilaye inyimbo izyakumupalizikizya u Mwene.

³³ U Mwene weyuyo akwendezya mumwanya, akujilimisya nizyu ikulu nkani.

³⁴ Mufumusyanje nizyamaka agha Chala, yuyo akubalaghila aba Izilayeli, sona amaka ghache ghali mumabingu.

³⁵ Wee Chala, we wakoghofya mubuzilo bwako ubuzelu nkani, sona u Chala uwa ba Izilayeli akubapa amaka abantu bache. U Chala apaliwanje.