Masalimo 65 - IBAYIBOLO 2024

Nizya kupala nukupalizya

Kumulongozi uwa bwimbi. Isalimo ilya Devedi Ulwimbo.

¹ Wee Chala, abantu bakupalaye mu Ziyoni, sona bakwanilisyanje ichilapo chabo kukwako.

² Awe we ukwivwa inyiputo, abantu bosi bizaghe kukwako.

³ Pakabalilo kako imbibi zikang'wama papitu, awe ukatuhobokela ububibi bwitu.

⁴ Basayiwa abantu babo ukabasala, nukubapalamizya papipi nawe ukuti bikalaye, mulubinjilo lwako ulwanongwa. Pakuti tukwiza pakwikuta ivintu ivyiza ivya munyumba yako, inyumba izelu.

⁵ Wee Chala Umupoki witu, ukutwamula pakutupoka ni mbombo zyako izyakuswighisya ingolosu. Abantu bosi aba pachisu ichapasi aba pisila ilya nyanja izya kubutali bakukusubila.

⁶ Ukulanjizya amaka ghako amakulu nkani, pakughikazya amaghamba.

⁷ Ukupumizya ukupoma ukwa nyanja ni chongo icha mayigha sona ni chongo icha inko izinji.

⁸ Ichisu chosi ichapasi chikukunyila pavintu ivikulu vivyo wabomba. Ukufuma kubufumilo bwizuba mupaka kubwinjililo bwizuba pakwimba inyimbo izya lusekelo.

⁹ Ukuchisaya ichisu ichapasi pakuchitumila ivula. Ukuchipela pakuba chamuvundo nkani. Po sona ukuzyizuzya isoko na mizi. Bope abantu ukubamezezya ingano. Pakuti momumo uchiyanizizye.

¹⁰ Ukughasembelela nkani amasabi, nukughavulumula. Po ukughatonteka nukusalasata ukwavula. Ichisu chinichi ukuchisaya ni mbeyu.

¹¹ Umwaka mukughuvwinka nu bwiza bwinyu, kosi kuko mukwenda mukwaghiwamo ivintu ivyinji nkani.

¹² Isote iteta likuboneka munkolongo yako. Po amaghamba ghizuye nu lusekelo.

¹³ Mope mumaghunda mwizuye ni midimo, sona amakombe ghizuye ni ngano. Po ivintu vyosi vikukolomoka nukwimba nu lusekelo.