Masalimo 64 - IBAYIBOLO 2024

Ulwiputo ulwakulaba ubupoki kubalwani

Kumulongozi uwa bwimbi. Isalimo ilya Devedi.

¹ Wee Chala wane ivwa izyu lyane bo nkukulambilizya, poka ubumi bwane munyobe izya balwani.

² Mpoka kumbatiko izya bantu ababibi, sona umpokaye kuvintu ivibibi vivyo amavyondongo ghakulonda pakumbombela.

³ Bakupyasya indimi zyabo ngati bo bapanga, sona amazyu ghabo ghakulasa ngati tulasilo.

⁴ Bakubavwamilila abantu babo bate ninongwa nukubalasa, bakubalasa lubilolubilo umwakusita ubogha bosi.

⁵ Bakukazannya pakubomba ivintu ivibibi, sona bakunenezannya izya kutegha ivipingo vyabo. Po bakuti, “Nkimba wewenu angavyennya?”

⁶ Bakwinong'ona ivibibi bakuti, “Apa po twabatika akiza nkani!” Naloli inyinong'ono nu moyo uwa muntu vichevu.

⁷ Loli u Chala akwiza pakubalasa nu tulasilo, po umwakuchenusya bulo bosi bakwiza bakuvulala.

⁸ Akwiza pakubanangannya na mazyu aghabo na ghabo nukubazimizya, bosi babo bakubennya bakwiza pakupukunnya imitu yabo.

⁹ Abantu bosi bakwiza pakuba nubogha, po bakwiza pakuzifumusya imbombo izya Chala, sona nukwinong'ona zizyo u Chala abomba.

¹⁰ Abagholosu bahobokaye pachifukwa icha Mwene, sona bachimbililaye kukwache. Bosi babo bali na moyo amagholosu bamupalaye.