Masalimo 63 - IBAYIBOLO 2024

Ukumusamba u Chala

Isalimo ilya Devedi pakabalilo kako akaba munkolongo iya Yudeya.

¹ Wee Chala, awe we Chala wane, sona nkukulondelezya nu moyo wane ghosi. Umoyo wane ghuli ni nyota nawe, sona umubili wane ghope ghukukusamba. Nkukusamba nkani ngati chisu ichumizu, sona ngati nkolongo yiyo yite na mizi.

² Nkulonda nkani pakukwennya mubuzilo bwako ubuzelu, unyitikizye ukuti nennyanje amaka ghako, sona nu buchindamu bwako.

³ Nkwiza pakukuchindika, pakuti ulughano lwako lwizapo ukuchila ubumi.

⁴ Nkwiza pakukupala bo inchili indi nubumi, sona nkwiza pakukwezya inyobe zyane pakukuchindika.

⁵ Umoyo wane ghukwiza pakuba ngati poghukwikuta ni vintu ivinoni, sona umulomo wane ghukwiza pakwimba, inyimbo izyakukupalizikizya.

⁶ Nkukukumbuka bo indambalaye pachitala chane, sona ubusiku bosi ukuba munyinong'ono zyane.

⁷ Pakuti we wamwavwilizi wane, cho chifukwa nkwimba nu buhobosu kusi ku vipapande vyako.

⁸ Umoyo wane ghukukakatiye, sona inyobe yako indilo yikunsungilila.

⁹ Loli bosi babo bakubatika pakubunangannya ubumi bwane, bakwiza pakubuka kuchisu ichibizu nkani.

¹⁰ Abantu banaba bakwiza pakughoghiwa kubwite, po bakwiza pakuba chakulya cha bakabila.

¹¹ Loli u mwene akwiza pakuhoboka pachifukwa icha Chala. Bosi babo bakalapila mwitabwa lyache, bamuchindikaye, bo abamyasi basona imilomo yabo.