Masalimo 62 - IBAYIBOLO 2024

Tusubilaye ubupoki ubwa Chala

Kumulongozi uwa bwimbi. Ukumwimbila u Yedutuni. Isalimo ilya Devedi.

¹ Umoyo wane ghukuba bulo myee, pakumulindilila u Chala wane, pakuti weyuyo akumpoka.

² Wee lyalabwe lyane nu bupoki bwane, sona we lilinga lyane, po ntakwiza pakuyingana nalumolumo.

³ Nkimba mukwiza pakuleka liyi pakumusambukila umuntu? Bosi abantu bakuyezya pakungogha, yuyo ayanite nulubumba lulo lusendamite, sona yuyo ali ngati lupaso lulo lukuneng'ena?

⁴ Bakalondagha bulo pakumunyunkula pabuzilo bwache ubwa buchindamu, sona bakuhoboka nkani nanti bakunena ubumyasi. Bakusaya nu mulomo wabo, loli mukasi mumoyo ghabo bakughuna.

⁵ Umoyo wane ghukuba bulo myee, pakumulindilila u Chala wane, ulusubilo lwane luli mumwache.

⁶ U Mwene we lyalabwe lyane, sona we bupoki bwane, we lilinga lyane, po ntakwiza pakuyingana.

⁷ Ubupoki bwane nu muchizi wane vyosi vili mwa Chala, we lyalabwe lyane ilyamaka, sona buzilo bwane ubwakuvwamilamo.

⁸ Mwebaya mumusubilaye akabalilo kosi, mumubuzyanje intamyo zyinyu zyosi, pakuti u Chala we buzilo bwitu ubwakuvwamilamo.

⁹ Abantu bosi bali ngati muyi bulo, abapasi na bapamwanya bosi bayanite bulo. Nanti bapimiwa ni chipimilo batakung'wama, pakuti bosi banaba bayanite bulo nu muyi.

¹⁰ Mutakavisubilaye ivyongo, pamo ukwituvikizya muvintu ivya bwiba. Napapo ubukabi bwinyu bwinji nkani, loli mutakabikayepo nkani umoyo.

¹¹ U Chala anenite koka bulo, po namanyilapo ivintu vibili, chimo chakuti: U Chala, wemwenecho uwa maka.

¹² Ichinji chakuti awe Mwene, we lughano, pakuti naloli ukwiza pakumupa umuntu wesi umuvwalo, ukuyana ni mbombo zyache.