Masalimo 61 - IBAYIBOLO 2024

Ulwiputo ulwakulaba ubupoki kubalwani

Kumulongozi uwa bwimbi. Pakubombezya amapango. Isalimo ilya Devedi.

¹ Wee Chala, ivwa ukulila kwane, sona teghelezya ulwiputo lwane.

² Nkukwitizya bo indikubumalilo ubwa chisu ichapasi, sona bo umoyo wane ghukutamiwa nkani. Po undongozezye kwilyalabwe itali nkani ukunchila.

³ Pakuti awe wame buzilo bwane ubwakuvwamilamo, sona we chitembe chicho chikunvighilila ku bantu abakumbenga.

⁴ Nkusamba nkani pakwikala mu Nyumba yako bwila na bwila, sona nukuti invwamaye kusi kuvipapande vyako.

⁵ Wee Chala, wavyivwa ivilapo vyane, po wampa ichilingo chicho bakupokela abantu babo bakulichindika itabwa lyako.

⁶ Onjelezyako amasiku agha bumi ubwa mwene, sona amaka ghache ghabanjeko mupaka nkulilo inyinji.

⁷ Wee Chala, umwitikizyanje ukuti ikalaye pachitengo chache icha bumwene pamaso papako bwila na bwila. Ulughano lwako, sona nu busubiliwa bwako vimuvighililaye.

⁸ Po akabalilo kosi nkwiza pakwimba inyimbo izyakulipala itabwa lyako, nukukwanilisya ivilapo vyane isiku ni siku.