Masalimo 60 - IBAYIBOLO 2024

Ulwiputo ulwakulaba ubupoki

Kumulongozi uwa bwimbi. Ukuyana nu lwimbo ulwakuti, “Ubwezya ubwa mumizi.” Ulusimikizyo. Isalimo ilya Devedi. Pakubamanyisya abantu pakabalilo kako u Yowabu akalwanga ubwite naba Alamu Nahalayimu, sona na Alamu Zoba. Pakabalilo kalakala u Yowabu akanyokela nukubaghogha aba Edomu 12,000 mwikombe ilya Mbeya.

¹ Wee Chala watuleka twebene, watunnyampannya sona watukalalila, polelo utunyosezye mumo tukabela.

² Wachiyingannya ichisu na kasenyenta nukuchizepula, uchimate pakuti chikuneng'ena nkani.

³ Wabitikizya abantu bako ukuti bakomane nintamyo impalapala, sona watung'wesya uvinyo, po tukutantalila nawe.

⁴ Loli aswe twe bantu bako babo tukukuchindika watubikiye indembela, ukuti tupone kubwite.

⁵ Tupoke nukutwavwa ni nyobe yako indilo, umwakuti twe baghaniwa bako tupone.

⁶ U Chala anena bo ali mubuzilo bwache ubuzelu ati, “Pachifukwa icha kupota kwane nkwiza pakugaba ichisu icha Shekemu, sona nabika impaka mwikombe ilya Sukoti.

⁷ Ichisu icha Giliyadi chane, sona chope icha Manase chane, ichisu icha Efulayimu cho chisote chane, sona icha Yuda yo mpalala iya bumwene

⁸ U Mowabu lyo libeseni lyane ilyakusukusulilamo, u Edomu we chakusumbilapo inkwato zyane. Nkwiza pakukolomoka bo nabapota aba Filisiti.”

⁹ Nkimba wewenu yuyo akwiza pakunfisya kukaya akakulu nkani aka malinga? Nkimba wewenu yuyo akwiza pakundongozezya ku Edomu?

¹⁰ Wee Chala, nkimba utatulekite twebene, umwakuti utakubuka poka na basilikali bitu?

¹¹ Utwavwe pakulwa na balwani bitu, pakuti ubwavwilizi ubwa muntu bute ni mbombo.

¹² Nanti u Chala ali naswe, po tukwiza pakupota ubwite, pakuti weyuyo akwiza pakubakanyankila abalwani bitu.