Masalimo 6 - IBAYIBOLO 2024

Ukulaba ubwavwilizi pakabalilo akantamyo

Kumulongozi uwa bwimbi. Pakubombezya amapango ukumwimbila u Sheminiti. Isalimo ilya Devedi.

¹ Wee Mwene utakanchemelaye, mubukalale bwako, pamo ukunfunda pachifukwa ichakuti ukalaye.

² Wee Mwene umpelelaye ichisa, pakuti ne mudedebazu. Wee Mwene umpozyanje, pakuti amafupa ghane ghakumbaba nkani.

³ Umuzimu wane ghukuyimba nkani. Wee Mwene nkimba zinizi zikwiza pakubombiwanga mupaka liyi?

⁴ Wee Mwene mpoka, sona umpokaye pachifukwa icha lughano lwako, lulo lutakumala nalumolumo.

⁵ Pakuti nanti umuntu afwa atakukukumbukagha. Nkimba wewenu yuyo angakupala bo ali mwipumpa?

⁶ Nalita pakukoloma, ubusiku bosi nkuchinyezya ichitala chane na masozi, sona nkuchidwibika mumasozi ichitengo chane.

⁷ Amaso ghane ghakwennya akafobela pachifukwa icha chitima, sona ghakwennya ichisi pachifukwa icha bosi babo bakumbenga.

⁸ Epako kukwane mwebosi mwe babomba imbibi, pakuti u Mwene ivwa ukulila kwane.

⁹ U Mwene ivwa ukulila kwane ukuti anyavwe, sona u Mwene apokela ulwiputo lwane.

¹⁰ Abalwani bane bosi bakwiza pakukoziwa isoni nukuba nubogha, po bakwiza pakuchimbila lubilolubilo pachifukwa icha soni.