Masalimo 59 - IBAYIBOLO 2024

Ulwiputo ulwakulaba ubupoki

Kumulongozi uwa bwimbi. Ukuyana nu lwimbo ulwakuti, “Mutakanangannye.” Isalimo ilya Devedi bo u Sabuli abatuma abantu pakutendendela inyumba iya Devedi umwakuti bamughoghe.

¹ Wee Chala, mpoka munyobe izya balwani bane, sona unvighilile ku bantu babo bansambukiye.

² Umpoke munyobe izya bantu ababibi, sona unyefye munyobe izya baghoghi.

³ Wee Mwene, ennya namumo bamvwamililiye ukuti bangoghe, abantu abakoghofya bakunvwimavwima, Wee Mwene napapo inte ninongwa pamo ukubanangila chimo.

⁴ Ntanangitepo nachimochimo, loli bakulonda pakulwa nane ubwite. Vundumuka unyavwe, sona zagha wennye vivyo vikubombiwa.

⁵ Wee Mwene u Chala Uwamaka Ghosi, sona Chala uwa Izilayeli, vundumuka ukuti ubafunde abantu aba inko izinji, sona utakabapelelaye ichisa abantu ababibi abazimbuli.

⁶ Bakubwelako pachamabwila, bakubwata ngati zyo mbwa, sona bakwendakwenda mukaya akakulu nkani.

⁷ Ivwa intuko zizyo zikufuma pamilomo yabo. Indimi zyabo zili ngati bo bapanga, po bakuti, “Nkimba wewenu yuyo angatwivwa?”

⁸ Wee Mwene, loli ukubaseka, sona ukubobezya abantu aba inko zyosi.

⁹ Wee Maka ghane, ane nkukwennya wewe, pakuti awe Chala we lilinga lyane.

¹⁰ Ulughano ulwa Chala wane lutakupotwangapo nalumolumo. U Chala akwiza pakunsindikila sona akwiza pakunyitikizya ukuti inhobokaye ukubennya abalwani bane bakupotwa.

¹¹ Wee Mwene ingulu yitu, loli utakabaghoghaye, lumo abantu bane bangaluvya, Ubanyampannye na maka ghako, sona ubawisizye pasi.

¹² Amituvyo ghabo ghabanje chipingo chabo, pachifukwa icha mbibi izya pamilomo yabo na mazyu agha pamalomo ghabo, sona na pachifukwa ichakuti bakunena ubumyasi nukubaghuna abanji.

¹³ Wee banangannye mubukalale bwako, ubanangannye mupaka bazimile bosi. Po abantu bakwiza pakumanya ukuti u Chala akumulaghila u Yakobo mupaka kubumalilo ubwa chisu ichapasi.

¹⁴ Bakubwelako pachamabwila, bakubwata ngati zyo mbwa, sona bakwendakwenda mukaya akakulu nkani.

¹⁵ Bakwendakwenda pakulonda ichakulya, loli nanti batikuta, bakukoloma.

¹⁶ Loli nkwiza pakwimba nizyamaka ghako, sona pandabindabi nkwiza pakwimba nizya lughano lwako. Pakuti awe we lilinga lyane, sona buzilo bwane ubwakuvwamamo pakabalilo akantamyo.

¹⁷ Wee Maka ghane, nkwiza pakukwimbila inyimbo izya mapalo, wee Chala, we lilinga lyane, sona ulughano lwako papane lutakupotwangapo nalumolumo.