Masalimo 58 - IBAYIBOLO 2024

Ukumulaba u Chala ukuti abafunde abantu ababibi

Kumulongozi uwa bwimbi. Ukuyana nu lwimbo ulwakuti, “Mutakanangannye.” Isalimo ilya Devedi.

¹ Mwee balongi, nkimba mukubalongela abantu mubwanaloli? Nkimba mukudumula inongwa pakwennya icheni?

² Amoyo ghinyu ghakwinong'ona bulo ivintu ivibibi vyene, sona inyobe zyinyu zikupela ivyongo vyene pachisu ichapasi.

³ Abantu ababibi bakusobela ukwandila bo bachili bali mulwanda, sona abantu abamyasi bakusobela ukwanda pisiku ilya kupapiwa kwabo.

⁴ Bali ni nsalile ngati nsalile izya njoka, sona ngati we chipili uwa mapuli,

⁵ yiyo yitakumwivwa uwa mayele, napapo angacheba nkani.

⁶ Wee Chala, ubakule amino mumulomo wabo, Wee Mwene pyolannya amino agha nkalamu zinizi!

⁷ Baleke bazimile bulo ngati mizi ghagho ghakwenda, leka utulasilo twabo tufokaye munyobe zyabo ngati lisote.

⁸ Babanje ngati nkovu yiyo yikwinjilakwinjila pakwenda, sona batakalyennyanje izuba ngati kwepa ukwa lwanda.

⁹ Bo isonta zyinyu zichili pakutukila nu butukizu ubwa inkwi izya mivwa, manyi mbisi, manyi zyumiye, abantu ababibi bakwiza pakuzimila.

¹⁰ Umuntu umugholosu akwiza pakuhoboka, bo akubennya ababibi bakufundiwa, sona akwiza pakuzyozya inyayo zyache mwibanda ilya bantu ababibi.

¹¹ Po abantu bakwiza pakunena ukuti, “Naloli abagholosu bakupokela umuvwalo wabo. Naloliloli u Chala aliko yuyo akuchilonga ichisu ichapasi.”