Masalimo 57 - IBAYIBOLO 2024

Ulwiputo ulwakulaba ubwavwilizi

Kumulongozi uwa bwimbi. Ukuyana nu lwimbo ulwakuti, “Mutakanangannye.” Isalimo ilya Devedi bo akumuchimbila u Sabuli nukuvwama kumpako.

¹ Wee Chala, umpelele ichisa, sona banga ni chisa nane, pakuti nkuchimbilila kukwako. Nkwiza pakuponela kusi kuvipapande vyako, mupaka ukankungu uwakunangannya adumusannye.

² Nkumulilila u Chala Uwakumwanya Nkani, yuyo akukwanilisya zizyo akamubatikila umuntu.

³ Akutuma ubwavwilizi bwache kumwanya nukumpoka, po akwiza pakubakozya isoni babo bakanjivya. U Chala akwiza pakungana pachifukwa ichakuti musubiliwa.

⁴ Indi pakasi pa nkalamu, sona indambalaye pakasi pa vinyamana ivyakoghofya. Banaba bo bantu babo bali na mino ngati zyo mpalala nu tulasilo, sona zyope indimi zyabo zikwete nkani ngati bapanga.

⁵ Wee Chala, lanjizya ubukulu bwako ukuchila mumwanya nkani, sona ubuchindamu bwako bwizulaye pachisu chosi icha ichapasi.

⁶ Bakutegha ichilepa ukuti bandeme, umoyo wane ghukuyimba nkani. Bakakumba ichiliba muzila yane, loli bawilamo bene muchibwina chilachila.

⁷ Wee Chala, umoyo wane wikalanite, naloli umoyo wane wikalanite. Po nkwiza pakwimba nukwata inyimbo.

⁸ Wee moyo wane, nyamuka! Wee chinanda ni pango lyane lilagha, nkwiza pakulinyamusya izuba ni nyimbo zyane.

⁹ Wee Mwene nkwiza pakupalizya pakasi pabantu aba inko izinji, sona nkwiza pakukwimbila inyimbo pakasi pa inko zyosi.

¹⁰ Pakuti ulughano lwako lukulu nkani, lulo lukufika mupaka kumwanya, sona ubusubiliwa bwako bukufika mupaka kumabingu.

¹¹ Wee Chala, lanjizya ubukulu bwako ukuchila mumwanya nkani, sona ubuchindamu bwako bwizulaye pachisu chosi icha ichapasi.