Masalimo 56 - IBAYIBOLO 2024

Ukumusubila u Chala

Kumulongozi uwa bwimbi. Ukuyana nu lwimbo ulwakuti, “Inkunda yiyo yili mwikwi ilyapabutali ilya mupandapanda.” Ulwimbo ulwa Devedi bo aba Filisiti bamulema mu Gati.

¹ Wee Chala, umpelelaye chisa, pakuti abalwani bane bakunchimbizya, sona akabalilo kosi bakunvwima.

² Isiku lyosi abakunyobezya bakunchimbizya, sona babo bakulwa nane binji nkani.

³ Nanti ubogha bwandema, nkwiza pakukusubila wewe.

⁴ Nkumupala u Chala, pachifukwa icha izyu lyache, imusubiye u Chala po ntakwiza pakunyilapo nachimochimo. Nkimba umuntu angambombela bubibi boni?

⁵ Isiku lyosi abalwani bane bakumpelela zyo ntamyo, sona akabalilo kosi bakubatika pakunvulazya.

⁶ Bakubungana nukunvwamilila, sona bakwennya vyosi vivyo nkuvibomba ukuti bangoghe.

⁷ Ubafunde pachifukwa icha ububibi bwabo, Wee Chala, ubanangannye nu bukali bwako abantu aba inko izinji!

⁸ Umenye namumo nkuyimbila, bika amasozi ghane musonta yako. Nkimba utavisimbite vyosi vinivi mwibuku lyako?

⁹ Po abalwani bane bakwiza pakunyokela kwisinda, pisiku lilyo nkwiza pakukwitizya ukuti unyavwe. Pachinichi inzimenye ukuti u Chala ali nane.

¹⁰ Nkumupala u Chala pachifukwa icha izyu lyache, nkumupala u Mwene pachifukwa icha izyu lyache.

¹¹ Imusubiye u Chala, po ntakwiza pakukunyilapo ichintu nachimochimo. Nkimba umuntu angambombela bubibi boni?

¹² Wee Chala wane nkalapa kukwko, sona nkwiza pakubika ivyakwiyipa ivyakupalizikizya.

¹³ Pakuti ukampoka ukuti indeke pakufwa, sona ukazipoka inyayo zyane ukuti zitakatyelemuke, umwakuti nendaye pamaso pa Chala mulukozyo ulwa bumi.