Masalimo 55 - IBAYIBOLO 2024

Ulwiputo ulwa muntu yuyo ali munyobe izya balwani

Kumulongozi uwa bwimbi. Pakubombezya amapango. Ukwinong'ona nkani isalimo ilya Devedi.

¹ Wee Mwene, teghelezya ulwiputo lwane, utakakusulannyanje ukwilumbusya kwane.

² Unteghelezyanje sona unyamule, pakuti umoyo wane ukuyimba nkani pachifukwa icha ntamyo zizyo nkukomana nazyo.

³ Nkupasya nkani pachifukwa ichakuti abalwani bane bakunyobezya, sona abantu ababibi bakunjivya. Pakuti bakunyizila nintamyo, sona bakumemenela amino mubukalale.

⁴ Umoyo wane ghukubaba nkani mukasi mumwane, vyope ivyakoghofya ivya bufwe vyanyibizya.

⁵ Ubogha nukutetema vyandema, vyope ivyakoghofya vyintenguye.

⁶ Po nkati, “Mwee nalondagha nkani ngali indi ni vipapande ngati vya nkunda, po ngali nabulukila kubutali nkani ukuti intuzye.

⁷ Naloli ngali nabulukila kubutali nukwikala munkolongo.

⁸ Ngali nachimbilila kuko nkwikala, pabutali nkani pakumuchimbila ukankungu ni mpepo iyamaka.”

⁹ Wee Mwene ubavulungannye abantu ababibi, pakuti nkwennya ivyongo nu buvulungane mukaya akakulu nkani.

¹⁰ Umusanya nu busiku bakuzyungulilazyungulila ulubumba lwache. Sona mukaya akakulu nkani muli ukulwa nintamyo.

¹¹ Ukunanganika kuli posi na posi mukaya akakulu nkani, sona ivyakoghofya nu bumyasi vitakwepamo mumisebo.

¹² Nanti umulwani yumo akansamulagha, ngali najimbite. Nanti yuyo akituvikizya papane akaba mulwani wane, ngali navwamite.

¹³ Loli wewe we uyanite nane, we wamwitu, sona umumanyani wane uwapamoyo.

¹⁴ Tukapangilanagha utupangwi utwiza bo tuli babili bulo sona bo tukubuka nabanji pakwiputa ku Nyumba iya Chala.

¹⁵ Ubufwe bubachenusyanje bulo abamanyani bane, sona binjilaye mwipumpa lubilolubilo, pakuti ububibi bukuwagha umuvundo pakasi papabo.

¹⁶ Loli nkumwitizya u Chala, po u Mwene akumpoka.

¹⁷ Pandabindabi, na pamusanya, sona na pachamabwila, nkulila nukukoloma, po akwivwa izyu lyane.

¹⁸ Akwiza pakubupoka ubumi bwane kubwite, bubo nkwiza pakulwa na balwani bane, napapo abakunsusya binji nkani.

¹⁹ U Chala yuyo ikaye pachitengo icha bumwene bwila na bwila akwiza pakubivwa nukubafunda. Pakuti bakukana pakwanduka, po batakumunyila.

²⁰ Umumanyani wane akubakoma abamanyani bache, sona akulunangannya ulufingo lwache.

²¹ Amazyu ghache matonte nkani ngati mafuta agha lukama, loli mumoyo wache muli ubwite. Amazyu ghache matonte nkani ukuchila amafuta loli ghayanite bulo na bapanga.

²² Mupe u Mwene intamyo zyako, po akwiza pakukusunga, pakuti atakwitikizya nalumolumo ukuti abantu bache abagholosu bawanje.

²³ Loli wee Chala ukubasumbila muchiliba ichibizu abantu ababibi, po abaghoghi na bazimbuli bakuba bumi, napo we hafu uwa masiku ghabo. Loli ane, nkusubiye wewe.