Masalimo 54 - IBAYIBOLO 2024

Ukulaba ubupoki kubalwani

Kumulongozi uwa bwimbi. Pakubombezya amapango. Ukwinong'ona nkani isalimo ilya Devedi bo abantu aba mu Zifi bakubuka kwa Sabuli pakumubuzya ukuti, “U Devedi akuvwama muchigaba chitu.”

¹ Wee Chala, umpoke ni tabwa lyako, sona umpimaye na maka ghako pakuba ne muntu umusita nongwa.

² Wee Chala wane ivwa ulwiputo lwane, sona teghelezya amazyu agha mumulomo wane.

³ Abantu abakwituvya bansambukiye, sona abantu aba moyo amakafu bakulonda pakungogha, babo batakupasya napo panandi nizya Chala.

⁴ Naloli u Chala we mwavwilizi wane, sona u Mwene musungilili wane.

⁵ U Chala abatanizyanje abalwani bane babo bakumbombela ububibi, sona ubanangannye pakuti we musubiliwa.

⁶ Nu moyo wane, nkwiza pakubika ichakwiyipa, wee Mwene nkwiza pakulipala itabwa lyako pachifukwa ichakuti we mwiza.

⁷ Pakuti akampoka muntamyo zyane zyosi, sona amaso ghane ghenizye namumo nkabapotela abalwani bane.