Masalimo 53 - IBAYIBOLO 2024

Ububibi ubwa muntu

Kumulongozi uwa bwimbi. Ukuyana nu lwimbo ulwakulumbusya. Ukwinong'ona nkani isalimo ilya Devedi.

¹ Umupunganu akunena mumoyo wache akuti, “U Chala ataliko.” Abantu bosi banyonganu, imbombo zyabo mbibi. Atalipo nayumoyumo yuyo akubomba inyiza.

² Bo ali kumwanya u Chala akubennya abantu pachisu ichapasi, umwakuti ennye nanti balipo bamo abantu, abamahala, babo bakumulondelezya u Chala.

³ Abantu bosi basobela sona baba banyonganu, sona atalipo nayumoyumo yuyo akubomba inyiza, awe atalipo nayumoyumo.

⁴ Fwandi ababomba imbibi bate na mahala? Bobabo bakubalya abantu bane ngati po bakulya chibama, sona bobabo batakumwiputa u Chala.

⁵ Kulakula bakwiza pakuba nubogha ubukulu nkani, ubogha bubo batabwenizyepo nalumo. U Chala akwiza pakughanyampannya amafupa agha bantu babo bakumubombela ububibi, mubakozyanje isoni pachifukwa ichakuti u Chala abakanite.

⁶ Mwee nalondagha nkani ngali ubupoki ubwa Izilayeli bukufumila ku Ziyoni! Bo u Chala akubapela abantu bache, ukuti ivintu vibendelaye sona akiza, u Yakobo asekelaye, sona wepe u Izilayeli ahobokaye.