Masalimo 52 - IBAYIBOLO 2024

Nizya bulongi ubwa Chala ni chisa chache

Kumulongozi uwa bwimbi. Ukwinong'ona nkani isalimo ilya Devedi. Bo u Dowegi uwamu Edomu abuka kwa Sabuli pakumubuzya ukuti, “U Devedi abuka kunyumba iya Ahimeleki.”

¹ Wee muntu uwamaka, nkimba choni chicho ukwituvikizya imbombo zyako imbibi? Fwandi choni chicho ukwituvya isiku lyosi, awe we muntu umukozya isoni pamaso pa Chala?

² Wee muzimbuli, akabalilo kosi ukwinong'ona nizya kubanangannya abanji, ululimi lwako luli ngati chipeni chicho chikwete nkani.

³ Ubughanite nkani ububibi ukuchila ubwiza, ubumyasi bope ubughanite nkani ukuchila ukunena ubwanaloli.

⁴ Wee muzimbuli, ululimi lwako lughaghanite nkani amazyu aghakubavulazya abanji.

⁵ Naloli u Chala akubanangannya bwila na bwila. Akwiza pakukuzompola munyumba yako, sona akwiza pakukunyunkulamo muchisu icha bantu abumi.

⁶ Abagholosu bakwiza pakwennya nukuba nubogha, bakwiza pakumuseka nukuti,

⁷ “Mwennye umuntu yuyo atakumusubila u Chala pakuba lilinga lyache, loli akubusubila ubukabi bwache, sona akuba na maka pakunangannya abanji.”

⁸ Loli ane indi ngati likwi ilya musyunguti ibisi mu Nyumba iya Chala, po indusubiye ulughano ulwa Chala lulo lutakupotwapo nalumolumo bwila na bwila.

⁹ Nkwiza pakukupala bwila na bwila, pachifukwa icha zizyo wabomba. Nkwiza pakulikwezya itabwa lyako pakuti lyiza, sona nkwiza pakukupala pamaso pabantu bako abazelu.