Masalimo 51 - IBAYIBOLO 2024

Ulwiputo ulwakulaba uluhobokelo

Kumulongozi uwa bwimbi. Isalimo ilya Devedi bo umulaghuzi u Natani amubuzya nizya bwamalaya bubo u Devedi akabomba nu Batisheba.

¹ Wee Chala, umpelelaye ichisa, pachifukwa icha lughano lwako lulo lutakupotwapo nalumolumo. Zimya ukunanga kwane, pachifukwa icha chililizi chako.

² Ubusukaye ububibi bwane bosi, sona unswefyanje kumbibi zyane.

³ Pakuti ukunanga kwane nkumenye, sona imbibi zyane nazyaghannya.

⁴ Nakunangila wewe, sona nabomba ivibibi pamaso papako, umwakuti ukuba mugholosu nanti ukudumula inongwa, sona nukuti ukulongela mubwanaloli.

⁵ Naloli nkapapiliwa mumbibi, nkaba ne mubibi ukwandila papo umayi wane akamela ulwanda.

⁶ Loli umoyo uwanaloli gho ghugho ukughulonda, po umanyisyanje amahala mukasi mumwane.

⁷ Unswefye ni chisilo, po nkwiza pakuswepa naloli, sona unyosyanje, po nkwiza pakuswepa ngati we kabefu.

⁸ Unyizuzyanje nukuhoboka nu lusekelo, amafupa ghane ghagho ukaghatizannya ghasekelaye.

⁹ Chifise icheni chako ukuti utakazyennyanje imbibi zyane, sona ubuzimyanje ububibi bwane.

¹⁰ Wee Chala, umpelele umoyo umuswepu, sona ubikayemo mukasi mumwane umuzimu umupya nu wamaka.

¹¹ Utakanchimbizye pamaso papako pamo ukunyefyezya Umuzimu wako Umuzelu.

¹² Unyosekezye sona ubuhobosu ubwa bupoki bwako, sona umpanje umoyo uwakwivwila.

¹³ Po nkwiza pakubamanyisya ababomba mbibi izila zyako, sona ababibi bope bakwiza pakunyokela kukwako.

¹⁴ Wee Chala Umupoki wane, umpokaye munyobe izya bantu abaghoghi, po nkwiza pakukwimbila pachifukwa ichakuti we mugholosu.

¹⁵ Wee Mwene ighula imilomo yane, po nkwiza pakukwimbila inyimbo izyakukupalizikizya.

¹⁶ Utakuhoboka ni vyakwiyipa, lumo ngali nkwiza navyo, sona utakahoboka ni vyakwiyipa ivyakocha.

¹⁷ Ivyakwiyipa vivyo vikumuhobosya u Chala, gho muzimu uwakwiyisya, po u Chala utakwiza pakughusulannya umoyo uwakwiyisya.

¹⁸ Ubabombelaye ubwiza abantu aba mu Ziyoni, zengagha sona ulupaso ulwa Yelusalemu.

¹⁹ Po vikwiza pakuba ivyakwiyipa ivigholosu, sona ivyakwiyipa vyosi ivyakocha vikwiza pakukuhobosya. Po bakwiza pakubika inkambaku pachighemo chako pakuba chakwiyipa.