Masalimo 50 - IBAYIBOLO 2024

Ukwiputa ukwanaloli

Isalimo ilya Asafu.

¹ U Chala Uwamaka Ghosi, u Mwene akunena, nukubitizya abantu muchisu chosi ichapasi, ukwandila kuko izuba likufumila mupaka kubwinjililo.

² U Chala akulama bo ikaye mu Ziyoni, akaya akakuboneka akiza nkani.

³ U Chala witu akwiza, sona atakwiza pakuba bulo myee. Pantazi papache pali umoto uwakulungulizya, sona impepo iyamaka yimuzyunguliye.

⁴ Akuchitizya ichisu ichakumwanya ni chisu ichapasi, umwakuti abalonge abantu bache:

⁵ “Babungannye pamaso papane abantu bane abasubiliwa, babo bakafingana nane pakubika ichakwiyipa.”

⁶ Kumwanya kukulumbilila ubugholosu bwache, pakuti u Chala umwenecho we mulongi.

⁷ “Ivwa kuno, mwee bantu bane bo nkunena, nkwiza pakubikila ubwakaboni, pakukususya awe Izilayeli. Ane ne Chala, u Chala winyu.

⁸ Ntakubachemela pachifukwa icha vyakwiyipa vyinyu, pamo pachifukwa icha vyakwiyipa ivyakocha, vivyo mukubika pamaso papane.

⁹ Intakuyilonda nayimoyimo inkambaku iya munyumba yinyu, pamo imbuzi iya muchibagha chinyu.

¹⁰ Pakuti ivinyamana vyosi ivya mumusitu vyane, sona ni ng'ombe zizyo zili mumaghamba aminji nkani zyane.

¹¹ Ivimenye iviyuni vyosi vivyo vikwikala mumaghamba sona ivipeliwa ivya mumaghunda vyane.

¹² Nanti nkabanga nizala ngali intakakubuzya, pakuti ichisu ichapasi chane, poka na vivyo vili mulamula.

¹³ Nkimba nkulyanga inyama iya nkambaku, pamo nkung'wela ibanda ilya mbuzi?

¹⁴ Bikagha ivyakwiyipa ivyakupalizikizya kwa Chala, sona kwanilisya ichilapo chinyu ku Wakumwanya Nkani.

¹⁵ Munyitizyanje pakabalilo akantamyo, nkwiza pakubapoka po mukwiza pakunchindika.”

¹⁶ Loli u Chala akumubuzya umuntu umubibi akuti, “Nkimba choni chicho ukughatambula amalamulo ghane, pamo pakulutambula ulufingo lwane pamulomo wako?

¹⁷ Pakuti uvibengite vivyo nkukubuzya, sona ukughasulannya amazyu ghane.

¹⁸ Nanti wamwennya umwiba nawe ukumanyana nawe, sona ukwenda mukabukatila aka balowe.

¹⁹ Ukughubombezya umulomo wako pakunena ivibibi, sona ululimi lwako lukwata ivyabumyasi.

²⁰ Akabalilo kosi ukumuyebagha umukamu wako, sona ukumunena akabibi uwamwinyu.

²¹ Wabomba ivintu vyosi vinivi, loli nkaba bulo myee, po ukinong'onagha ukuti injanite bulo nawe. Loli nkwiza pakukuchemela nukukususya pazizyo wabomba.

²² “Amwe mwe mumuluvyizye u Chala, muzyinong'onaye izi, lumo ningabazepulannya, po atalipo nayumoyumo umuntu uwakubapoka.

²³ Umuntu yuyo akubika ivyakwiyipa ivyakupalizikizya akunchindika, sona yuyo akwenda izila ingolosu nkwiza pakumulanjizya ubupoki bwane.”