Masalimo 5 - IBAYIBOLO 2024

Ulwiputo ulwakulaba ubupoki

Kumulongozi uwa bwimbi. Pakubombezya amalonji. Isalimo ilya Devedi.

¹ Wee Mwene, ivwa amazyu ghane, sona teghelezya ukukoloma kwane.

² Wee Mwene wane, sona Chala wane, ivwa ukulila kwane, po unyavwe, pakuti nkwiputa kukwako.

³ Wee Mwene wane, pandabindabi ukwivwa izyu lyane, sona pandabindabi nkukubuzya vivyo nkuvilonda, po nkulindilila ukuti unyamule.

⁴ Awe te we Chala yuyo ukuhoboka ni mbibi, sona ababibi batangikala poka nawe.

⁵ Abakwitutumula batangafika pamaso papako, sona ubabengite bosi ababomba imbibi.

⁶ Ukubanangannya bosi babo bakunena ubumyasi, sona u Mwene ababengite abaghoghi na bazimbuli.

⁷ Loli pachifukwa icha chisa chako ichikulu nkani, ane nkwiza pakwinjila munyumba yako. Nkwiza pakufughama nukukuchindika munyumba yako izelu.

⁸ Wee Mwene, awe we mugholosu, unvighililaye pakuti abalwani bane binji nkani, sona ungolosezye izila iyakuti nendayemo.

⁹ Pakuti amazyu ghabo ghate masubiliwa napo panandi, sona amoyo ghabo ghizuye ni vintu ivyakunangannya bulo. Amamilo ghabo mighuke ngati gho mapumpa, sona indimi zyabo zikunena bo bumyasi bwene.

¹⁰ Wee Chala, ubafundaye, sona balemiwanje muvipingo vyabo. Ubefyepo pamaso papako pachifukwa icha mbibi zyabo inyinji, pakuti bakusambukiye.

¹¹ Loli bosi babo bakuvwama mumwako bahobokaye, sona bimbaye bwila na bwila pachifukwa icha buhobosu. Ubavighililaye umwakuti abantu bosi babo bakughanite, bahobokaye mwitabwa lyako.

¹² Wee Mwene, naloli ukubasaya abagholosu, sona ukubavighilila ni ngulu yako.