Masalimo 49 - IBAYIBOLO 2024

Ubupunganu pachifukwa ichakusubila ubukabi

Kumulongozi uwa bwimbi. Isalimo ilya baluko ulwa Kola.

¹ Ivwa kuno, mwe bantu aba inko zyosi, teghelezya mwebosi mwe mukwikala muchisu ichapasi.

² Ivwa kuno mwe bantu mwebosi abapasi na bapamwanya, sona mwe bakabi na bapina bulo.

³ Umulomo wane ghukwiza pakunena amazyu aghamahala, sona inyinong'ono zyane zikwiza pakubamanyisya akivwisizye aka vintu.

⁴ Nkwiza pakutegha ikutu lyane ukuti nivwe ichili, sona nkwiza pakuchisanusya ichili chila pakwimba ichinanda.

⁵ Nkimba choni chicho inyilaye, pakabalilo akantamyo, bo abalwani banzyunguliye?

⁶ Abantu banaba basubiye bulo ubukabi bwabo, sona bakwituvya pachifukwa icha bwinji ubwa bukabi bwabo.

⁷ Atalipo nayumoyumo umuntu yuyo angabutabula ubumi ubwa muntu uyunji, pamo ukumupa u Chala ichakwiyipa ichakwitabulila mwene.

⁸ Pakuti ichakubutabulila ubumi bwache chamutengo umukulu nkani, ghataliko amalipilo aghakukwana aghakutabulila ubumi.

⁹ Umuntu atangabutabula ubumi bwache ukuti abanje nubumi bwila na bwila, sona nukuti atakafwanje.

¹⁰ Naloli umuntu wesi angennya ukuti abantu abamahala bope bakufwanga. Bope abapunganu na babo bate na mahala bakufwanga, nukubalekela abantu abanji bulo ubukabi bwabo.

¹¹ Amapumpa ghabo ghakwiza pakuba zyo nyumba zyabo izya bwila na bwila, sona buzilo bwabo ubwakwikalamo inkulilo ni inkulilo, Vikwiza pakuba bunubu, napapo bakavyita ivyisu amatabwa ghabo.

¹² Napapo umuntu angaba mukabi, pope bulo akufwanga ngati mumo vikufwila ivinyamana.

¹³ Izi zyo zizyo zikubawila abantu babo bisubiye bene, sona bo bumalilo ubwa babo bakughakonka amazyu ghanagha.

¹⁴ Babukaye kuchisu icha bafwe ngati zyo ng'ozi, ubufwe bukwiza pakuba mudimi wabo. Pandabindabi abantu abagholosu bakwiza pakubalaghilagha, amabili ghabo ghakubola muchisu icha bafwe kako kaya kabo kubutali nutwaya twabo utwiza.

¹⁵ Loli u Chala akwiza pakubutabula ubumi bwane mwipumpa, pakuti akwiza pakumpokela.

¹⁶ Utakapasyanje nanti umuntu akuba mukabi, bo ubukabi ubwa munyumba yache bukonjelela.

¹⁷ Pakuti nanti umuntu afwa, atakwiza pakusendapo nachimochimo ichintu, sona ubukabi bwache butakwiza pakubuka nawe.

¹⁸ Napapo akiyennyanga mwene pakuba musayiwa bo mumi, sona nanti abantu bope bakukupala bo vikukwendela akiza,

¹⁹ pope bulo akwiza pakubakonka abanyenya bache, babo batakwiza pakulwennyapo nalumo ulukozyo.

²⁰ Umuntu yuyo ali nu bukabi loli nanti ate na mahala, ayanite bulo ni vinyamana vivyo vikufwa.