Masalimo 48 - IBAYIBOLO 2024

Akaya akakulu nkani aka Ziyoni aka Chala

Ulwimbo. Isalimo ilya baluko ulwa Kola.

¹ U Mwene mukulu nkani, yuyo amapalo ghamubaghiye. Tumupalaye mukaya kache akakulu nkani bo ali pighamba lyache izelu.

² Ko kaya akakuboneka akiza nkani aka Ziyoni, ulusekelo lwachisu chosi ichapasi. Ighamba ilya Ziyoni lili kumitu, ko kaya aka mwene witu Umukulu Nkani.

³ U Chala ilanjizya mwene ukuti akukavighilila akaya kala, pakuti akwikala mukasi mumalinga ghache.

⁴ Abamwene bakabungana poka, bakalonda pakulwa ubwite nako.

⁵ Loli bo bakennya bulo, bakaswigha, po bakachimbila pachifukwa icha bogha.

⁶ Bakatetema nkani sona bakivwa ububavu, ngati mukolo yuyo ali pakusayiwa umwana.

⁷ Ukabanangannya ngati mabwato agha ku Talishishi, ghagho ghakumongoliwa ni mpepo iyakubufumilo bwizuba.

⁸ Ngati mumo twivwila, po twavyennya, vyosi mukaya akakulu nkani aka Mwene Uwamaka Ghosi, sona kako kaya akakulu nkani aka Chala witu. U Chala akakikazya ukuti kabanjeko bwila na bwila.

⁹ Wee Chala, bo tuli mu Nyumba yako, tukwinong'ona nizya lughano lwako lulo lutakupotwapo nalumolumo.

¹⁰ Wee Chala, ngati mumo libeleye itabwa lyako, momumo amapalo ghako ghakufika mupaka kubumalilo ubwa chisu, sona inyobe yako indilo yizuye nu bugholosu.

¹¹ Abantu aba mu Ziyoni bahobokaye, utwaya utwa mu Yuda tusekelaye pachifukwa ichakuti ukulongela mubwanaloli.

¹² Mukazyungulilaye akaya akakulu nkani aka Ziyoni, sona belenga ichitembe chache.

¹³ Mughenelezyanje nkani amalinga ghache, mudumusannyanje pakasi pa nyumba izya bumwene, umwakuti muzibuzyanje inkulilo izya muntazi.

¹⁴ Pakuti u Chala yunuyu we Chala witu bwila na bwila, sona akwiza pakutulongozya mupaka tufwe.