Masalimo 47 - IBAYIBOLO 2024

U Chala we mulaghili uwa Chisu chosi

Kumulongozi uwa bwimbi. Isalimo ilya baluko ulwa Kola.

¹ Mwee bantu aba inko izinji, komagha inkufi, mumwimbilaye umwakulomoka u Chala pachifukwa icha buhobosu.

² Pakuti u Chala Uwakumwanya Nkani wakuswighisya, we Mwene umukulu nkani pachisu chosi ichapasi.

³ Akubapota abantu aba inko izinji pakuba pasi papitu, sona akulubika uluko ulunji kusi kunyayo zyitu.

⁴ Akatusalila ichisu chinichi pakuba mpyana yitu, chicho chakwituvikizyamo icha Yakobo yuyo akamughana nkani.

⁵ U Chala akakwela bo abantu bakukolomoka pachifukwa icha buhobosu, sona u Mwene akwela kumwanya, bo abantu bakulizya amapati.

⁶ Mumwimbilaye u Chala inyimbo izya mapalo, mumwimbilaye amapalo u Mwene witu, mumwimbilaye inyimbo izyakumupalizya.

⁷ Pakuti u Chala we Mwene uwa chisu chosi ichapasi, mumwimbilaye ulwimbo ulwamapalo.

⁸ U Chala akubalaghila abantu aba inko zyosi, U Chala ikaye pachitengo chache ichizelu icha bumwene.

⁹ Abalongozi aba pachisu ichapasi babunganite poka, ngati bantu aba Chala uwa Abulahamu. Pakuti abamwene aba pachisu ichapasi ba Chala, yuyo wapamwanya nkani.