Masalimo 46 - IBAYIBOLO 2024

U Chala ali naswe

Kumulongozi uwa bwimbi. Ulwimbo ulwa baluko ulwa Kola. Ulwimbo lulo abalindu bakimbagha.

¹ U Chala we wapakuvwama pitu, sona we maka ghitu, yuyo iyanizye pakutwavwa pakabalilo akantamyo.

² Polelo tutakumunyila, napapo ichisu ichapasi chinganduka, napapo amaghamba ghangawila munyanja inyibizu.

³ Napapo amizi ghangapoma nukuba ni tatafula, amaghamba ghakutetema pachifukwa ichakupoma ukwa mizi.

⁴ Pali ulusoko lumo lulo utusoko twache tukubahobosyanga abantu aba mukaya akakulu nkani aka Chala, ubuzilo bubo buzelu bubo Uwakumwanya Nkani akwikalako.

⁵ U Chala ali mukaya akakulu nkani kalakala, po katakwiza pakunanganika, po u Chala akwiza pakukavwa bo izuba likufuma.

⁶ Abantu aba inko izinji bakali, ubumwene ubwakulekanalekana bukutetema. Nanti u Chala akunena, ichisu chikusunguluka.

⁷ U Mwene Uwamaka Ghosi ali naswe, sona u Chala uwa Yakobo we lilinga lyitu.

⁸ Zagha mwennye imbombo izya Mwene, sona namumo achinanganizizye ichisu ichapasi.

⁹ Akumazya ubwite mupaka kubumalilo ubwa chisu ichapasi, sona akubupolannya ubwele ni mpalala, nukuzyocha ingulu.

¹⁰ “Banga bulo myee, sona uzimanye ukuti ne Chala, sona abantu aba inko izinji bakwiza pakumpala, bope abantu aba muchisu ichapasi bakwiza pakunkwezya.”

¹¹ U Mwene Uwamaka Ghosi ali naswe, sona u Chala uwa Yakobo we lilinga lyitu.