Masalimo 45 - IBAYIBOLO 2024

Ulwimbo ulwapasendwa iya munyumba iya bumwene

Kumulongozi uwa bwimbi. Ukuyana nu lwimbo ulwa “Bwezya ubwa mumizi.” Ukwinong'ona nkani isalimo ilya baluko ulwa Kola. Ulwimbo ulwapasendwa.

¹ Umoyo wane wizuye ni pangwi ilyiza, bo indi pakumwimbila u mwene ulwimbo lwane. Ululimi lwane luli ngati chakusimbila icha musimbi yuyo amenye nkani pakusimba.

² Awe we wakuboneka akiza nkani ukubachila abanavuli bosi, sona amalomo ghako ghapakaziwa ni chisa, pakuti u Chala akusayite bwila na bwila.

³ Wee musilikali umujivu, pinyilila upanga wako mumusana, mubuchindamu nu bukulu bwako.

⁴ Bukagha nu buchindamu bwako pakupota abalwani bako, pakuvivighilila ubwanaloli, nukwiyisya nu bugholosu. Yilekaye inyobe yako indilo yibombaye imbombo zyako izyakoghofya.

⁵ Tulasilo twabo tuto tukwete tulase amoyo agha balwani abamwene, sona inko izinji zyosi ziwanje pasi pavinama vyako.

⁶ Wee Chala ichitengo chako icha bumwene chibanjeko bwila na bwila, sona ukulaghila mubwanaloli mubumwene bwako.

⁷ Ubughanite ubugholosu sona ububengite ububibi. Polelo u Chala wako akupakazya na mafuta agha buhobosu ukubachila abamanyani bako.

⁸ Amenda ghako ghosi ghakununkila na mafuta agha mule, nagha aloyi sona nagha kasiya. Inyumba zyako izya bumwene zizengiwe na mino agha zovu, sona mulamula bakukuhobosya ni vyakwimbila ivya mpote izya chela.

⁹ Abana abalindu aba bamwene bali pakasi pa bakolo bako abachindikiwa, sona kunyobe yako indilo kwimiliye u mwene umukolo, yuyo avwalite amenda agha golide uwamu Ofili.

¹⁰ Wee mulindu teghelezya! Ivwa amazyu nukughinong'onela, sona ubaluvye abakamu bako na bamunyumba iya ghuso.

¹¹ U mwene akukunyonywa pachifukwa ichakuboneka kwako akiza, po umuchindikaye pakuti we mwene wako.

¹² Abantu aba mu Tile, bakwiza ni vyabupi, sona abakabi nkani bakwiza pakulonda ukuti ubapelelaye ichisa.

¹³ Umwana umulindu umwiza nkani uwa mwene ali muchipinda chache, sona avwalite amenda agha golide.

¹⁴ Bakubuka nawe kwa mwene bo avwalite amenda aghakulabiwa, sona abamanyani bache abalindu bakumusindikila bo bakwiza nawe pamaso papako.

¹⁵ Bakubasindikila nu buhobosu sona nukusekela ukukulu nkani, nukumwinjizya munyumba iya mwene.

¹⁶ Abana bako bakwiza pakusenda ubuzilo ubwa baghuso bako, sona ukwiza pakubimika pakuba bamwene pachisu chosi ichapasi.

¹⁷ Nkwiza pakuzipela inkulilo zyosi ukuti zilikumbukaye itabwa lyako, polelo abantu aba inko zyosi bakwiza pakukupala bwila na bwila.