Masalimo 44 - IBAYIBOLO 2024

Ulwiputo ulwakulaba ubupoki

Kumulongozi uwa bwimbi. Ukwinong'ona nkani isalimo ilya baluko ulwa Kola.

¹ Wee Chala, na makutu ghitu tukivwa, sona abanyenya bitu batubuzizye, vivyo ukabomba pakabalilo kabo.

² Ukabachimbizya abantu aba inko izinji, nukubikazya abanyenya bitu mulamula. Ukabayivya abantu aba uluko ulunji, nukubitikizya abanyenya bitu ukuti ivintu vibendelaye akiza.

³ Batakachifyula ichisu pakubombezya abapanga babo, pamo ukupota ubwite na maka ghabo. Loli bakapota na maka ghako amakulu nkani agha nyobe yako indilo, sona nukulama ukwa cheni chako pakuti ukabaghana nkani.

⁴ Wee mwene wane wee Chala, yuyo ukamupa u Yakobo ubupoti.

⁵ Pachifukwa icha maka ghako tukubapota abalwani bitu, sona na pachifukwa icha itabwa lyako tukabakanyankila pasi abakulwana naswe.

⁶ Intakubusubila ubwele bwane, sona nupanga wane wepe atanganyavwa pakupota.

⁷ Loli watupoka kubalwani bitu, sona ukabakozya isoni abakutubenga bosi.

⁸ Tukwituvikizya mwa Chala akabalilo kosi, sona tukwiza pakulipala itabwa lyako bwila na bwila.

⁹ Loli ilelo utupiye inkonto nukutukozya isoni, sona utakabuka poka na basilikali bitu pakulwa ubwite.

¹⁰ Ukitikizya ukuti tubachimbile abalwani bitu, po abakutubenga bakatufyula ivintu vyitu.

¹¹ Ukitikizya ukuti tubanje ngati po twe ng'ozi yiyo bakubuka nayo pakuyibola, sona ukatunyampannya pakasi pabantu aba inko izinji.

¹² Ukabaghulizya abantu bako pamutengo uwakwika nkani, sona utakakabapo nachimochimo.

¹³ Ukabitikizya abapalamani bitu ukuti batusekaye, abantu babo batuzyunguliye bakutusamula nukutobezya.

¹⁴ Ukatupela pakuba chintu ichakusekezya pakasi pabantu aba inko izinji, sona uluko ulwa bantu lukupukuzya imitu yabo nanti bakutwennya.

¹⁵ Isiku lyosi nkusamuliwa, sona icheni chane chope chili ni soni.

¹⁶ Pakwivwa amazyu agha abantu babo bakunsamula nukunyobezya, pachifukwa icha mulwani yuyo imiliye pakutanizya.

¹⁷ Ivintu vinivi vikatuwila, napapo tutakakuluvya pamo pakuba bazimbuli kulufingo lwako.

¹⁸ Amoyo ghitu ghatakaghalabukila kubunji, zyope inyayo zyitu zitalekite pakwenda muzila yako.

¹⁹ Loli ukatubika muntamyo, nukutupela pakuba nkolongo sona watuvwinka ni chisi ichakoghofya nkani icha bufwe.

²⁰ Nanti tukaliluvya itabwa ilya Chala witu, sona nukubachindika abachala abayeni,

²¹ nkimba ngali u Chala atakazyaghannya zinizi, pakuti azimenye izya kubusyefu bosi ubwa moyo uwa muntu?

²² Loli pachifukwa icha wewe, tukukomana nu bufwe isiku lyosi. Tuli ngati zyo ng'ozi zizyo zikubuka pakuboliwa.

²³ Wee Mwene, lamusya, sona nkimba choni chicho ukughona utulo? Nyamuka, sona utakatuleke twebene bwila na bwila.

²⁴ Nkimba choni chicho ukufisa icheni chako, sona choni chicho waziluvya intamyo zyitu na mayimba ghitu?

²⁵ Aswe twawa pasi palufumbi, amabili ghitu ghali bulo lambalala palufumbi.

²⁶ Nyamuka nukutwavwa, sona ututabule pachifukwa icha lughano lwako lulo lutakupotwa nalumolumo.